اسلام آباد۔19جولائی (اے پی پی) وزیراعظم شہباز شریف کشمیریاں دے عزم آزادی کوں سلام پیش کریندیں ہوئین آکھیا جو کشمیری نسل درنسل آپݨے جائز اتے منصفانہ حق خوداردایت ڳھنݨ کیتے قربانیاں ݙیندے پئن۔ اقوام متحدہ دی سلامتی کونسل دی قرارداداں اتے کشمیری عوام دی امنگاں دے مطابق تنازعہ کشمیر دے حل اتے استصواب رائے دے منصفانہ حق ڳھنݨ تئیں پاکستان کشمیریاں دی ہرممکن مدد کریندا رہسی۔ اے ڳالھیں انہاں یوم الحاق پاکستان دے موقع تے آپݨے سنیھے اچ آکھی۔ ہر سال 19 جولائی کوں کشمیری عوام یوم قرارداد الحاق پاکستان دے طور منیندن۔ ایں تاریخی ݙینھ پاکستان نال الحاق دی قرارداد منظور کیتی ڳئی ہئی۔ سرینگر دی ڄاہ تے تاریخی قراراداد الحاق پاکستان دی منظوری دے بعد آزاد کشمیر اتے گلگت بلتستان دی عوام ہک وݙی جنگ آزادی لڑی اتے ریاست دے ہک حصے کوں ڈوگرہ مہاراجہ دے ظالمانہ شکنجے توں آزاد کرایا۔
