اسلام آباد۔19جولائی(اے پی پی) پاکستان اتے سری لنکا دیاں کرکت ٹیماں وچال گال اچ ٹیسٹ میچ جاری اے جیڑھا چوتھا ݙینھ مکݨ تے وݙا دلچسپ تھی ڳئے اتے قومی ٹیم کوں چھیکڑی ݙینھ جیتݨ کیتے 120 رنز دی لوڑھ اے اتے اوندیاں ست وکٹاں باقی ہین۔ ایں توں پہلے چوتھے ݙینھ سری لنکا دی ٹیم 337 رنز ٻما تے آئوٹ تھی ڳئی ہئی اتے پاکستان کوں جیتݨ کیتے 342 رنز دا ہدف ملیے۔ چندی مل سنچری نی ٻݨا سڳیے اتے 94 رنز تے ناٹ آؤٹ رہین، اننگز اچ محمد نواز 5، یاسر شاہ 3، حسن علی اتے نسیم شاہ ہک ہک وکٹ ڳھدی۔ ولدے اچ قومی ٹیم دے اوپنرز عبداللہ شفیق اتے امام الحق باعتماد کھیݙ ݙکھائے اتے 87 رنز دا اوپننگ سٹینڈ ݙتے جو امام الحق 35 رنز ٻݨا تے آئوٹ تھی ڳین۔ اظہر علی وی 6 دے سکور تے ول ڳین ٻھل کپتان بابر اعظم وکٹ تے عبداللہ شفیق نال ڄم ڳین اتے 55 رنز ٻݨا تے پویلین ولین۔ انہاں اڄ ٹیسٹ کیریئر اچ 3 ہزار رنز وی پورے کیتن۔ ݙوڄھے ایند تے اوپنر عبداللہ شفیق کیرئر دی ݙوڄھی سنچری کر تے 112 رنز تے موجود ہین ڄݙاں جو محمد رضوان 7 رنز تے کریز تے موجود ہن۔ پاکستان چوتھا ݙینھ مکݨ تے 222 رنز جوڑ ڳھدن اتے پنجویں اتے چھیکڑی ݙینھ قومی ٹیم کوں 120 رنز دی لوڑھ اے اتے اوندیاں 7 وکٹاں باقی ہین۔
