رحیمیار خان: ٻیڑی ٻݙݨ دا واقعہ، تریڄھے ݙینھ وی لاشاں ڳولݨ دا کم اجری، مرݨ آلیاں دی تعداد 33 تھی ڳئی

رحیم یار خان۔20جولائی(اے پی پی)رحیم یار خان دی تحصیل صادق آباد دے نیڑے ماچھکہ دے علاقے اچ ڄنڄ آلی ٻیڑی ٻݙݨ نال ہݨ تئیں مرݨ آلیاں دی تعداد 33 تھی ڳئی اے ڄݙاں جو باقی 16 ڄݨے دیاں لاشاں لٻھݨ کیتے امدادی کم تریڄھے ݙینھ وی جاری رہے۔ ݙسایا ڳئے جو لاشاں ڳولݨ کیتے ریسیکو 1122 اتے مقامی ٹٻی بازاں سودھا  پاک فوج دے ایس ایس جی کمانڈوز وی سرچ آپریشن اچ شامل ہین۔ اے ٻیڑی 3 ݙینھ پہلے ٻݙی ہئی جیندے 50 ڄݨے بچا ڳھدے ڳئے ہن اتے ہݨ تئیں دریا توں 33 لاشاں کݙھیاں ڳین ڄݙاں جو حالی وی 16 ڄݨے لاپتہ ہین۔ مرݨ آلیاں اچ ودھ تعداد تریمتیں اتے ٻالاں دی ہے۔ریسکیو ٹیماں حادثے دی ڄاہ توں گھوٹکی تئیں لاشاں ڳولݨ اچ ردھیاں ہوئن۔