سرائیکی ادبی اکیڈمی ولوں کوٹ ادو توں تعلق رکھ‏‏ݨ آلے سرائیکی دے شاعر منظور سیال دی شاعری دے ݙوجھے مجموعے ” سیئت” دی ڳھنڈ کھلائی

اسلام آباد۔25جولائی  (اے پی پی سرائیکی سروس) سرائیکی ادبی اکیڈمی ولوں کوٹ ادو توں تعلق رکھ‏‏ݨ آلے  سرائیکی دے شاعر منظور سیال دی شاعری دے ݙوجھے مجموعے  ” سیئت” دی ڳھنڈ کھلائی  پنجاب آرٹس کونسل راولپنڈی اچ تھئی ، جیندی صدارت معروف اسکالر تے ورلڈ سرائیکی کانگریس دے چئیرمین ڈاکٹر غضنفر مہدی کیتی تے مہمان خصوصی ممتاز شاعر تے دانشور ڈاکٹر فرحت عباس ڄڈاں جو مہمانان اعزاز بابا مسعود الدین گنج شکر دی چئیر پرسن محترمہ راشدہ نبیل، پروفیسر خورشید احمد سعیدی، نیئر سرحدی ہن تے ایڈیٹر کونسل دے صدر فدا شیرازی تے  طاہر فاروق بلوچ وی گالھ مہاڑ کیتی ۔ تقریب توں خطاب کریندے  ممتاز سکالر ڈاکٹر غضنفر مہدی چیئرمین ورلڈ سرائیکی کانگرس آکھیا جو  سرائیکی زبان، ادب تے ثقافت دی  ترقی تے ترویج کیتے جامع حکمت عملی مرتب کیتی ونجے ۔ انھاں آکھیا جو سرائیکی زبان تے ادب ملک دا عظیم ثقافتی سرمایہ اے پر  اینکوں مسلسل نظر انداز کیتاویندا پیا اے ۔ انھاں آکھے جو ثقافتی ورثے دے تحفظ سانگے ہک جامع حکمت عملی مرتب کیتی ونجے ۔تقریب دے  مہمانان خصوصی ڈاکٹر فرحت عباس آکھیا جو  سرائیکی ادب کوں  قدرت بہوں بہت مالا مال کیتا اے  ، شاعر منظور سیال سرائیکی شاعری اچ محبت دے موضوع دے نال نال حیران کرڈیوݨ آلے لینڈ سکیپ توں متعارف کروائے ۔ ماہر تعلیم پروفیسر خورشید احمد سعیدی آکھے جو منظور سیال آپدے  علاقے دیاں محرومیاں تے تریخ تے  ادب کوں سرائیکی ڈوہڑیاں، غزلاں اتے نظماں اچ  بیان کرتے ایں خطے اچ نویں جہت متعارف کروائی، شاعری اچ قافیہ، ردیف نال  تخیل بیانی اتے لفظیں کوں سوچ دے پیمانے اچ رکھ تے بیان کیتا اے ۔ کالمسٹ، شاعر، کارٹونسٹ مظہر شہزاد آکھے جو سرائیکی زبان دے لفظ شہد وانکݨ میٹھے ان ۔ایندے اچ  عاجزی تے انکساری تے لذت اے۔ نیئر سرحدی آکھیا جو منظور سیال دیہاتی زندگی دی سچی تے  سادہ پر متحرک عکاسی کیتی اے ۔ فدا شیرازی آکھے جو سرائیکی شاعری دیاں ساریاں صنفاں اچ کم کیتے جیندے اچ انفرادیت دا رنگ نشابر اے ۔ سرائیکی ادبی اکیڈمی دی چیئر پرسن ڈاکٹر سعدیہ کمال آکھے جو  منظور سیال دی شاعری محبت تے  ثقافت دی تشریح کریندی اے ۔انھاں آکھے جو “سیئت” دی  شاعری اچ  دریا، چولستان تے  سرائیکی وسیب دے ڈھیر رنگ موجود ان ۔ بابا مسعود الدین گنج شکر اکیڈمی دی  چیئر پرسن راشدہ نبیل حسین آکھے جو منظور سیال دی شاعری اچ  صوفیاء نال  عقیدت دا  رنگ واضح اے ۔  تقریب دی نظامت کریندے ہوئے شاہد دھریجہ آکھے جو منظور سیال آپدے خطے تے  تہذیب دا نشابرالا بنݨ تے سامݨے آئے ۔  تقریب اچ  منظور سیال آپدا کلام پیش کریندے خوب داد گھدی، مشاعرے اچ  رفیع رفعت، نواب مضطر، طاہر فاروق بلوچ وی آپدا کلام سݨایا جیکوں حاضرین بہوں پسند کیتاتے  داد ݙتی جڈاں جو محفل موسیقی اچ مہدی حسن دے شاگرد آصف علی اتے مشتاق نیازی آپدیاں سوھݨیاں آوازاں اچ کلام سݨا تے  حاضرین کوں جھمݨ تے مجبور کرڈتا ۔ تقریب اچ ملک اسماعیل کھوکھر، محمد عاصم چن، شاہد عباس عباسی، عظیم مغل، سجاد حسین کورائی،محمد وسیم عباس،افشاں قریشی ، نبیلہ حفیظ، نرگس جنجوعہ ، محسن اقبال، ازہان نیازی، ساحل نیازی، خاور لغاری، عمید حجانا دے  علاوہ  ادیباں اتے شاعراں تے صحافیاں دی وݙی تعداد شریک تھئی ۔ تقریب دےاخیر اچ سرائیکی ادبی اکیڈمی دی چیئر پرسن ڈاکٹر سعدیہ کمال  معزز مہماناں کوں  سرائیکی اجرک وی پوائی ۔