قانون اچ سقم پاروں نجکاری نی تھیندی پئی، آئی ایم ایف نال پروگرام تے دستخط کر ݙتن، پٹرولیم مصنوعات دے وافر ذخائر موجود ہن، وفاقی وزیر خزانہ مفتاح اسماعیل

اسلام آباد۔27جولائی  (اے پی پی) وفاقی وزیر خزانہ مفتاح اسماعیل آکھیا جو قانون اچ سقم پاروں نجکاری نی تھیندی پئی، آئی ایم ایف نال پروگرام تے دستخط کر ݙتن، پٹرولیم مصنوعات دے وافر ذخائر موجود ہن۔ اساں مستقبل اچ معاشی ترقی تیز اتے مہانگ ڳھٹ کرݨ چاہندوں۔ بدھ کوں اے ڳالھیں انہاں سرکاری اداریاں دی کارکردگی بہتر کرݨ بارے تھیوݨ آلے سیمینار توں خطاب کریندیں ہوئیں آکھی۔ وزیرخزانہ آکھیا جو سرکاری اداریاں نال مستقل مسئلے ہن، ہک چھوٹا بینک 2007 توں نقصان کریندا پئے۔ اوندی نجکاری نی تھی سڳدی۔ روزویلٹ ہوٹل دی نجکاری نی تھیندی پئی، نجکاری قانون اچ سقم اے جئیں پاروں نجکاری نی تھیندی پئی۔ اساں کوں نجکاری کیتے قانون بہتر کرݨے، سرکاری کمپنیاں دی انتظامیہ کوں بہترکرݨے۔ انہاں آکھیا جو آئی ایم ایف نال معاہدے تے دستخط کر ݙتن۔ اساکوں آئی ایم ایف توں چار ارب ڈالر ملسن۔ آئی ایم ایف دی پیشگی شرطاں پوری کر ݙتن۔ صوبیاں وی آئی ایم ایف معاہدے تے عملدرآمد کیتے یقین ݙوائے۔ آئی ایم ایف اینٹی کرپشن قانون کوں موثر ٻݨاوݨ دی لوڑھ تے زور ݙتے۔