اسلام آباد۔28جولائی (اے پی پی) پاک فوج اتے ایف سی سیلاب توں متاثرہ علاقیاں اچ امدادی سرگرمیاں اچ سول انتظامیہ دی مدد کریندی پئی اے۔ آئی ایس پی آر دے مطابق بلوچستان اچ آرمی ایوی ایشن دے ݙو ہیلی کاپٹر کراچی توں اوتھل، لسبیلہ دے علاقیاں کیتے روانہ تھی ڳئن۔ انہاں ہیلی کاپٹراں گزریل 48 گھنٹیاں اچ وی امدادی کماں اچ حصہ ڳھدا ہئی پر خراب موسم پاروں ودھ پرواز نی کر سڳیے۔ ہݨ انہاں ہیلی کاپٹراں دے ذریعے پھتے لوکاں کوں محفوظ اتے ضروری امدادی سامان پجایا ویندا پئے۔ گوادر اچ جنرل آفیسر کمانڈنگ ریسکیو اتے ریلیف کماں دی نگرانی کیتے اوتھل دے علاقے دا دورہ کیتا جڈانجو اڄ خضدار اچ سینئر مقامی کمانڈر خضدار اتے نیڑے دے سیلاب توں متاثرہ علاقیاں دا دورہ کریسن۔ پنجاب دے علاقےڈی جی خان اچ سیلاب اتے طوفانی بارشاں توں متاثرہ جہیں تے پاک فوج امدادی کوششاں اچ سول انتظامیہ دی مدد کریندی پئی اے۔ سیلاب توں متاثرہ مقامی لوکاں کوں طبی امداد ݙیوݨ کیتے فوج ولوں ݙو میڈیکل کیمپ لاتے ڳئن۔
