اسلام آباد۔28جولائی (اے پی پی) وزیرِ اعظم شہباز شریف مون سون بارشاں اتے سیلاب توں متاثرہ علاقیاں اچ نقصان دی تعین کیتے وفاقی وزراء دی کمیٹی ٻݨا ݙتی اے اتے متاثرہ مکاناں کوں معاوضے کوں ودھاوݨ دی ہدایت کیتی۔ کمیٹی آندے چار ݙینھ اچ متاثرہ علاقیاں دا دورہ کریسی۔ کمیٹی دی سفارش تے متاثری دی بحالی کیتے جامع منصوبہ ٻݨایا ویسی۔ خمیس کوں وزیراعظم آفس دے میڈیا ونگ توں جاری بیان موجب وزیراعظم دی صدارت اچ اڄوکی بارشاں اتے سیلاب اچ نقصان دے جائزے کیتے اجلاس تھیا۔ وزیراعظم دی ہدایت تے مون سون بارشاں اتے سیلاب توں متاثرہ علاقیاں اچ نقصان دی تعین کیتے وفاقی وزراء دی کمیٹی ٻݨا ݙتی ڳئی۔ وزیراعظم ہدایت کیتی جو متاثرہ اتے زخمیاں دی امداد کوں پنڄاہ ہزار توں ودھا تے ݙولکھ تئیں کیتا ونڄے۔ کچے اتے پکے مکاناں دی انڄ انڄ امداد کوں ختم کر تے سارے متاثرہ مکاناں کیتے ہک سویں امداد ݙتی ونجے۔ جزوی طور متاثرہ مکاناں دی امداد پنجوی ہزار توں ودھا تے اݙھائی لکھ اتے پورے متاثرہ گھراں کیتے پنڄاہ ہزار توں ودھ تے پںج لکھ کیتا ونڄے۔ وزیراعظم آکھیا جو وفاقی حکومت قدرتی آفات دے اثرات نال نبڑݨ کیتے صوبائی حکومتاں نال تعاون کریسی۔ پاکستان اساں ساریاں دی ذمہ واری اے، آپسی تعاون نال لوکاں دی مدد کریسوں۔ وزیراعظم ہدایت کیتی جو قومی تے صوبائی ڈیزاسٹر مینجمنٹ اتھار ڈزاسٹر مینجمنٹ دی بجائے ڈزاسٹر رسک مینجمنٹ دی حکمتِ عملی تے عملدرآمد یقینی بݨاون۔
