اسلام آباد۔30جولائی (اے پی پی) نریندرا مودی دی جماعت بی جے پی دے 2014 اچ اقتدار اچ آوݨ دے بعد مودی دی حکومت بی جے پی دے انتہا پسند ہندواں دے ہتھوں مسلماناں اتے ٻئی اقلیتاں تے مظالم دا سلسلہ جاری اے ۔ حالانکہ بھارت دی ہک ارب 40 کروڑ دی آبادی اچ تقریباً 15 فیصد مسلمان اتے 80 فیصد ہندو ہن۔ تجزیاں کاراں اتے مبصرین دے مطابق بی جے پی اتے اوندی نظریاتی سرپرست راشٹریہ سویم سیوک سنگھ ( ار ایس ایس) ہندواں کوں مسلمان اتے عیسائی مذہب اختیار کرݨ تے خبر دار کیتا اتے بھارت اچ آبادیاتی عدم توازن” روکݨ تے زور ݙتے۔ انہاں آکھیا جو بھارت دے آزادی دے عبد توں مسلماناں کوں آئینی تحفظات دے باوجود منظم امتیازی سلوک، تعصب اتے تشدد دا سامݨا کرݨا پئے۔ انہاں ٻیا آکھیا جو مذہبی اقلیتاں دے انسانی حقوق دی خلاف ورزیاں جاری ہن۔ جئیں اچ غیر قانونی حراست، تشدد، اتے قیدیاں دی جعلی مقابلیاں اچ ہلاکتاں، لوکاں تے کھلے عام حملہ کرݨ، انہاں دے ذریعہ معاش اتے ٻہوں معاملیاں اچ انہاں دی عبادت غواہاں دے خلاف وݙے پیمانے تے مداخلت شامل اے۔ سارے خصوصی قوانین جیڑھے سالاں پہلے بݨائے ڳئے ہن۔ پولیس دے ہتھوں مسلم نینگراں کوں کوڑے مقدمیاں اچ پھساوݨ اتے بغیر کہیں سماعت دے سالیں تئیں جیلاں اچ رکھݨ ذریعہ ٻݨ ڳئے۔ ہیومن رائٹس واچ دی ہک رپورٹ اچ آکھیا ڳیا جو بھارت اچ حکام ایجھے قوانین اتے پالیسیاں ٻݨائن جئیں دے ذریعے منظم طریقے نال مسلماناں نال امتیازی سلوک کیتا ویندے اتے حکومت دے ناقدین کوں بدنام کیتا ویندے۔ حکمران ہندو قوم پرست بھارتیہ جنتا پارٹی (بی جے پی) آزاد اداراں، جینویں پولیس اتے عدالتاں اچ مداخلت کریندی اے اتے قوم پرست گروپاں کوں مذہبی اقلیتاں کوں دھمکیاں ݙیوݨ، ہراساں کرݨ اتے انہاں تے حملے کرݨ تے اکسیندی اے۔ ۔ہیومن رائٹس واچ دی جنوبی ایشیا دی ڈائریکٹر میناکشی گنگولی آکھیا جو حکومت نہ صرف مسلماناں اتے ٻئی اقلیتاں کوں حملیاں توں بچاوݨ اچ ناکام اے بلکہ سیاسی سرپرستی اتے تعصب کوں تحفظ ݙیندی پئی اے۔ اے پی پی نال ڳالھ مہاڑ کریندیں ہوئیں سابق سفیر آصف درانی آکھیا جو اگرچہ بھارت آئین ملک دی سیکولر نوعیت دی ڳالھ کریندے پر سارے عملی مقاصد بارے اے ہک ہندو ریاست اے۔ جنرل (ر)طلعت مسعود آکھیا جو اڄوکی حکومت مسلماناں اتے ٻئی اقلیتاں کوں ٻیا دباوݨ کیتے ہندوتوا دے نظریے کوں ودھیندی پئی اے۔ معروف مصنف اتے تجزیہ کار ارشاد محمود آکھیا جو بھارت اچ مسلماناں کوں محدود کیتا ویندا پئے۔ بی جے پی دی حکومت انہاں کوں پسماندہ اتے بے اختیار کیتا ڳئے۔ ڈاکٹر اعجاز حسین آکھیا جو سیکولر ہندواں دے نال نال غیر ہندو برادریاں کوں سماجی اتے سیاسی طور تے مجبو کیتا ویندے جو او یا تاں ہندوتوا دے اقدار کوں اپناون یا شہریت چھوڑ ݙیون۔ غیر آر ایس ایس اتے بی جے پی گروپاں اتے سیاسی جماعتاں کوں انہاں صفاں اچ رلاوݨا پوسی اتے سارے محاذاں تے متحد موقف رکھݨا پوسی۔ بین الاقوامی برادری کوں وی مودی سرکار ولوں آر ایس ایس دی آڑ اچ کیتی ڳئی غلطیاں تے سوال چاوݨ اتے اوندا سختی نال نوٹس ڳھنݨ دی لوڑھ اے۔
