اسلام آباد۔30جولائی (اے پی پی) پاکستان اتے کنٹرول لائن دے ݙوہیں پاسوں پوری دنیا اچ رہوݨ آلی کشمیری پنڄ اگست کوں یوم استحصال منیسن ۔ اے ݙینھ بھارت دے غیر قانونی طور قبضے اچ جموں تے کشمیر اچ بھارت دے ہک پاسہ اتے غیر قانونی اقدامات دے ترائے سال پورے تھیوݨ تے منایا ویندا پئے۔ بھارت اچ برسراقتدار نریندر مودی دی ہندو فرقہ پست حکومت کشمیر دی بھارتی تسلط توں آزادی کیتے جدوجہد کرݨ آلے رہنماواں کوں انتقامی کاروائیاں دا نشانہ بݨاوݨ کیتے مختلف ہتھکنڈے استعمال کریندی پئی اے۔ ایں سلسلے کوں اڳوں ودھیندیں ہوئیں بھارت پنج اگست 2019 کوں غیر قانونی اتے ہک پاسہ کشمیر دی خصوصی حیثیت کوں ختم کر ݙتا اتے آئین دے آرٹیکل 35 اے اتے 370 کوں معطل کر تے کشمیر تے آپݨے غیر قانونی فوجی قبضے کوں ٻیا مضبوط ٻݨاوݨ دی کوشش کیتی۔ بھارت دے ڈومیسائ اتے ملکیتی قوانین مقبوضہ جموں تے کشمیر دے آبادیاتی ڈھانچے اتے کشمیریاں کوں اقلیت اچ بدلݨ کیتے بدلیے ڳئے۔ کشمیری عوام بھارتی حکومت دے ظالمانہ اتے غیر قانونی اقدامات دے خلاف جدوجہد کریندے پئن۔ بھارتی حکومت دے 5 اگست 2019 دے غیر قانونی اقدام دے بعد مقبوضہ کشمیر اچ ہزاراں لوکاں کوں گرفتار کر تے جیلاں اچ سٹیا ڳئے۔ حریت کانفرنس دی پوری قیادت اتے آزاد پسند کارکناں کوں فرضی مقدمیاں اچ عقبت خانے اتے گھراں اچ نظر بند کیتا ڳئے۔ اے ہک مسلمہ حقیقت اے جو جموں تے کشمیر ہک بین الاقوامی طور تے منیا ہوئیا تنازعہ اے جیڑھا جو اقوام متحدہ دے ایجنڈے تے موجود اے اتے ایندا حل اقوام متحدہ دی سلامتی کونسل دی متعلقہ قرارداداں تے عملدرآمد تے اے۔ پاکستان دا اے موقف اے جو جنوبی ایشیا اچ پائیدار امن دا خواب اقوام متحدہ دی قرارداداں اتے کشمیری عوام دی خواہشات دے مطابق تنازعہ کشمیر دے پر امن حل تے اے۔ عالمی برادری دی اے ذمہ واری اے جو اگر بھارت انہاں غیر قانونی اتے ہک پاسہ اقدامات کوں ختم کراوے اتے اقوام متحدہ دی قرارداداں اتے کشمیری عوام دی خواہشات دے مطابق مسئلہ کشمیر دا حل کیتا ونڄے۔
