اسلام آباد۔31جولائی (اے پی پی) بھارت ولوں 5 اگست 2019 کوں ریاست اچ آبادیاتی تبدیلیاں ڳھن آوݨ دے مذموم عزائم نال جموں تے کشمیر دے متنازعہ علاقے دی قانونی حیثیت کوں بدلݨ دی کوشش کیتی اتے پوری وادی کوں دنیا دی ساریاں توں وݙی انسانی جیل اچ بدل ݙتے جتھ سارے بنیادی حقوق سلب کرݨ دے نال نال شہریاں دی زندگی کوں اجیرن ٻݨا ݙتے۔ بھارتی پارلیمنٹ دی نام نہاد قرارداد دے ذریعہ بھارتی آئین دے آرٹیکل 370 اتے 35A دے تحت علاقے کوں ݙتی ڳئی خصوصی حیثیت اتے خودمختاری کوں منسوخ کیتا ڳئے۔ آرٹیکلز دی دی ڄاݨ ٻڄھ تے غیرقانونی تنسیخ علاقے دے مقامی لوکاں کیتے پریشان ودھائی اے۔ بھارتی حکومت بے گناہ شہریاں دے خلاف جارحانہ اقدامات شروع کر ݙتن جئیں نہ صرف انہاں کوں زندگی دی بنیادی سہولت تئیں رسائی توں محروم کر ݙتے بلکہ انہاں کوں قابض فوج دے ہتھوں بدترین ظلم تے بربریت جئیں اچ طویل کرفیو اتے ماورائے عدالت قتل، عصمت دری ، گرفتاریاں، بدسلوکی اتے حراست اچ تشدد دا سامݨا کرݨ تے مجبور کر ݙتے۔ آئینی لحاظ نال غیر منصفانہ سلوک دے علاوہ فورسز مقامی بغاوت کوں کچلݨ کیتے وی ہرممکن کوشش کیتی اے جئیں کیتے دنیا دے ساریاں توں اُچے ملٹری زون اچ مواصلاتی لائناں کٹ ݙتی ڳئن۔ مسئلہ کشمیر دے ماہر اتے رفاہ انٹرنیشنل یونیورسٹی اسلام آباد دے اسسٹنٹ پروفیسر اویس بن وصی کشمیر تے اڄوکی دستاویزی عالمی تحقیق دا حوالہ ݙیندیں ہوئیں اے پی پی کوں ݙسیا جو اے زمینی حقائق ہن جو بھارتی غیر قانونی زیرتسلط مقبوضہ کشمیر اچ قابض فوج دی وݙے پیمانے تے موجودگی پاروں ساریاں توں وݙا ملٹری زون ٻݨ ڳئے جتھ انسانی حقوق دی وݙے پیمانے تے خلاف ورزیاں کیتی ویندی پئن۔ اسلام آباد اچ رہوݨ آلے ورکنگ جرنلسٹ اتے ماہر تعلیم صوفیہ صدیق خبر رساں ایجنسی کوں ݙسیا جو مقبوضہ کشمیر اچ ݙاہ لکھ توں ودھ فورسز دی تعیناتی ایں حقیقت کوں نشابر کریندی اے جو علاقہ مکیناں کیتے ساریاں توں وݙی انسانی جیل ٻݨا ݙتے۔ اویس بن وصی آکھیا جو بھارتی حکومت ولوں متنازعہ سرزمین تے بین الاقوامی معاہدیاں دی دھوکہ دہی اتے کھلی خلاف ورزی تے عالمی برادریاں کوں احساس ہووݨا چاہیدے۔
