ہلال احمد
ترجمعہ: محمد نعیم خان
اسلام آباد۔31جولائی (اے پی پی) بھارت 1947 اچ جموں وکشمیر تے آپݨا غیر قانوینی تسلط قائم کر تے کشمیری عوام کوں محکوم بݨا ڳھدے، او اقوام متحدہ دی قرارداداں دے مطابق کشمیریاں کوں انہاں دا جائز حق خودارادیت ݙیوݨ نی چاہندا اتے کشمیریاں دے آزادی دے مطالبے کوں دباوݨ کیتے انہاں کوں ہمیش توں ظلم تے جبر دا نشانہ ٻݨائے۔ سیاسی تجزیہ کاراں اتے ماہرین امور کشمیر دے مطابق مسئلہ کشمیر دا کلھا، دیرپا اتے مستقل حل صرف اقوام متحدہ دی قرارداداں دے مطابق استصواب رائے نال ممکن اے۔ اقوام متحدہ دی سلامتی کونسل 13 اگست 1948ءاتے 5 جنوری 1949ء سودھے کئی موقعیاں تے آپݨی قرارداداں اچ کشمیری عوام نال کیتا ڳیا وعدہ ہئی جو انہاں کوں آپݨے مستقبل دے فیصلے کیتے رائے شماری دا موقع ݙتا ویسی۔ افسوس دی ڳالھ اے جو بھارت ݙو قومی نظریے تے عملدرآمد اتے اقوام متحدہ دی قرارداداں کوں نافذ کرݨ دی بجائے کشمیر دے مسئلے دے حل اچ ہمیش رپھڑ پاتے اتے مطالبہ حق خودارادیت دباوݨ کیتے مقبوضہ کشمیر اچ انسانی حقوق دی بے دریغ پامالیاں کیتن۔ کل جماعتی حریت کانفرنس دے جنرل سیکرٹری شیخ عبدالمتین ، اقوام متحدہ دی قرارداداں دی اہمیت کوں اجاگر کریندیں ہوئیں آکھیا جو مقبوضہ کشمیر اچ انسانی حقوق دی سنگین پامالیاں کریندا پئے۔ آݙت وار کوں اے پی پی نال ڳالھ مہاڑ کریندیں ہوئیں انہاں آکھیا جو بھارت ہک منصوبے نال سوچی سمجھی سازش دے تحت کشمیریاں دی نسل کشی کریندا پئے۔ مودی دی قیادت اچ بھارتی انتہا پسنداں خطے دے امن داؤ تے لاتے۔ حریت کانفرنس دے رہنماء آکھیا جو بھارت کوں پنڄ اگست 2019ء دے غیر قانونی اتے ہک پاسہ اقدامات کوں واپسی ڳھݨا چاہیدے اتے مقبوضہ علاقے دے آبادیاتی ڈھانچے کوں بدلݨ کیتے آپݨے غیر قانونی اقدامات کوں روکݨا چاہیدے۔ سابق سفیر آصف درانی ایں بارے ڳالھ مہاڑ کریندیں ہوئیں آکھیا جو عالمی برادری کوں مقبوضہ کشمیر دی صورتحال دا نوٹس ڳھݨا چاہیدے، انسانی حقوق دی سنگین خلاف ورزیاں کوں روکݨ اتے اقوام متحدہ دی سلامتی کونسل دی قرارداد دے مطابق کشمیریاں کوں انہاں دا حق خودارادیت ݙواوݨ کیتے بھارت تے دباؤ پاوݨ دی لوڑھ اے۔ واضح راہوے جو کشمیر بارے پنج اگست دے ہک پاسہ اتے غیر قانونی بھارتی اقدامات دے خلاف آواز چیندیں ہوئیں پاکستان اتے کشمیر دی عوام ایں ݙینھ کوں یوم استحصال دے طور منیسن اتے عالمی برادری کوں اے یاد دیانہ کریسن جو کشمیر ہک متنازعہ خطہ اے جئیں تے بھارت سارے بین الاقوامی قوانین کوں نظر انداز اتے متنازعہ خطے دی عوام دی خواہشات توں ہٹھ تے قبضہ کر رکھیے۔ ݙوجھے پاسوں پاکستان ہمیشہ مسئلہ کشمیر دے اقوام متحدہ دی قرارداداں اتے کشمیری عوام دی خواہشات اتے امنگاں دے مطابق حل کیتے ریاست جموں تے کشمیر دی عوام دی سیاسی، اخلاقی اتے سفارتی سطح تے حمایت کیتی اے۔ مبصرین آکھیا جو مسئلہ کشمیر دا کلھا، دیر پا اتے مستقل حل صرف اقوام متحدہ دی قرارداداں دے مطابق نال ای ممکن اے۔ کشمیریاں دا وی مطالبہ اے جو اقوام متحدہ دی سلامتی کونسل دی قرارداداں دے مطابق انہاں کوں آپݨے مستقبل دا فیصلہ خود کرݨ دا موقع ݙتا ونڄے۔
