اسلام آباد۔2اگست (اے پی پی) کل جماعتی حریت کانفرنس آزاد کشمیر شاخ دے سینئر رہنما محمد فاروق رحمانی آکھیا جو جموں تے کشمیر آپݨی سیاسی آزادی دے حق اچ آواز چاوݨ تے ظلم سہندیں سہندیں تاریخ دی المناک ریاست ٻݨ ڳئی اے پر ایندے باوجود او آپݨے حق اتے تاریخی تشخص توں دستبردار تھیوݨ کوں تیار کائنی۔ کشمیرمیڈیاسروس دے مطابق محمد فاروق رحمانی اسلام آباد اچ جاری ہک بیان اچ آکھیا جو جموں تے کشمیر دے ہک کروڑ 30 لکھ عوام کوں آپݨے مستقبل دا فیصلہ کرݨ دا حق حاصل اے اتے او کہیں کوں جموں تے کشمیر دی متنازعہ حیثیت کوں بدلݨ دی موکل کائنا ݙیسن۔ انہاں آکھیا جو اسلامی تعاون تنظیم اتے قوماں، ریاستاں دے وقار اتے انہاں دے بنیادی حقوق تے یقین رکھݨ آلے ٻئے مہذب ریاستاں کوں پنڄ اگست کوں کشمیریاں دی جدوجہد آزادی دی پوری حمایت دا اعادہ کرݨا چاہیدے۔ انہاں آزادی دے مقدس مشن کیتے آپݨٰی جاناں دا نذرانہ پیش کرݨ آلے سارے کشمیریاں کوں شاندار عقیدت پیش کیتا۔ انہاں دنیا دی توجہ 1998 دے سورن کوٹ پونچھ قتل عام آلے پاسے ݙوائی جݙاں ترائے اتے چار اگست 1998 دی وچلی رات کوں بھارتی فوجیاں ہک کشمیری حسن محمد شیخ دے ٹٻر دے 19 بندیاں دا قتل عام کر ݙتا ہئی۔ اکتوبر اچ جموں تے کشمیر دے انسانی حقوق کمیشن ولوں کیتی ڳئی ہک انکوائری اچ وی بھارتی فوجیاں ایں قتل عام اچ ملوث تھیوݨ دی تصدیق کیتی ہئی۔ فاروق رحمانی اقوام متحدہ اتے اسلامی تعاون تنظیم توں کشمیر داتنازعے دے حل کرݨ تے زور ݙتا۔
