سرینگر۔3اگست (اے پی پی) کل جماعتی حریت کانفرنس دے غیر قانونی طور تے نظر بند چیئرمین مسرت عالم بٹ آکھیا جو 5اگست2019مقبوضہ کشمیر دی تاریخ دا کالا ݙینھ اے۔ جݙاں مودی دی فسطائی بھارتی حکومت جموں تے کشمیر دی خصوصی حیثیت کوں منسوخ کر ݙتا ہئی۔ کشمیرمیڈیاسروس دے مطابق مسرت عالم بٹ بھارت دی جیل توں ہک سنیھے اچ آکھیا جو مقبوضہ کشمیر دی عوام آپݨے مادر وطن تے بھارتی قبضے دے خلاف پرامن جدوجہد آزادی جاری رکھی پئن اتے انہاں 05 اگست 2019 کوں مودی دی فسطائی بھارتی حکومت سارے غیر آئینی اتے غیر قانونی سامراجی اقدامات کوں مسترد کر ݙتے۔ انہاں آکھیا جو ترائے سالیں توں مسلسل جاری محاصرے اتے بھارتی ریاستی دہشت گردی پورے مقبوضہ علاقے اچ جئیں کوں مودی حکومت ایذا رسانی دے ہک مرکز اچ بدل ݙتے، خوف تے دہشت دا ماحول بݨا ݙتے۔ انہاں افسوس کیتا جو محصور کشمیریاں کوں دنیا لاوارث چھوڑ ݙتے اتے عالمی برادری دی مجرمانہ چُپ پاروں بھارت کوں مقبوضہ کشمیر اچ انسانیت کوں فوجی ٻوتاں تلوں کچلݨ دی ترغیب ملی اے۔ مسرت عالم بٹ آکھیا جو قابض بھارتی فورسز مقبوضہ علاقے اچ ہر ݙینھ کشمیریاں دے قتل عام، انہاں تے ظلم ، گرفتاریاں، لٹ مار اتے ٻئے سنگین جرائم اچ مصروف ہن۔ جݙانجو انہاں کشمیری عوام بھارت اتے دنیا کوں اے نشابر سنیھا ݙیوݨ کیتے بے مثال قربانیاں ݙیندے پئے جو او بھارتی قبضے کوں نی منیندے اتے اقوام متحدہ دی قرارداداں دے مطابق جموں تے کشمیر اچ غیر جانبدرارانہ رائے شماری تئیں آپݨی جدوجہد جاری رکھیسن۔
