سرینگر۔3اگست (اے پی پی) غیر قانونی طور تے بھارت دے زیر قبضہ جموں تے کشمیر اچ کل جماعتی حریت کانفرنس دے رہنماواں ولوں جمعے کوں کالا ݙینھ مناوݨ دی اپیل کیتی اے تانجو دنیا کوں اے سنیھا ݙتا ونڄے جو او جموں تے کشمیر اچ بھارت دے غیر قانونی اقدامات کوں نی منیندے۔ کشمیر میڈیاسروس دے مطابق کل جماعتی حریت کانفرنس دے سینئر رہنماء میر واعظ عمر فاروق جو 4اگست2019 توں مسلسل گھر اچ نظر بند ہن سرینگر اچ جاری ہک بیان اچ آکھیا جو کشمیریاں توں پنج اگست جمعے کوں کالا ݙینھ مناوݨ دی اپیل کیتی اے۔ انہاں آکھیا جو کشمیری عوام آپݨے حق خودارادیت ڳھنݨ تئیں آپݨی جدوجہد کریندے رہسن۔ میرواعظ آکھیا جو پنڄ اگست دے مودی دے ہک پاسہ اقدامات جموں تے کشمیر دی سںڄاݨ، ثقافت، آبادی اتے بنیادی حقوق تے حملہ اے۔ انہاں پوری دنیا چ رہوݨ آلے کشمیریاں تے زور ݙتا جو او جمعے کوں بھارتی جارحیت دے خلاف احتجاج کرن اتے دنیا دی توجہ مقبوضہ جموں تے کشمیر دی مظلوم عوام دی حالت زار آلے پاسے کراون۔ کل جماعتی حریت کانفرنس دے رہنماواں غلام محمد خان سوری، ہلال احمد وار اتے عبدالصمد انقلابی آپݨے انڄ انڄ بیانات اچ جموں تے کشمیری دی خصوصی حیثیت دی منسوخی کوں کشمیریان نال بھارت دی غداری اتے وعدہ خلافی قرار ݙتے۔ انہاں افسوس کیتا جو دنیا دی مجرمانہ چپ پاروں بھارت کوں کشمیر دی خصوصی حیثیت دی منسوخ دا حوصلہ ملیے جو عالمی قوانین دی خلاف ورزی اے۔ کل جماعتی حریت کانفرنس دے رہنماواں ولوں جمعے کوں کالا ݙینھ مناوݨ دی اپیل کیتی اے۔
