برسلز۔5اگست (اے پی پی)کشمیر کونسل ای یو ولوں بیلجیئم دے دارالحکومت برسلز اچ ایکسٹرنل ایکشن سروس (یورپی وزارت خارجہ) دے ٻاہر احتجاجی کیمپ لاتا ڳیا۔ ایں موقع تے کئی کشمیریاں ، پاکستانیاں اتے یورپی باشندیاں نہتے کشمیریاں تے کیتے ڳئے بھارتی ظلم دی مذمت کیتی اتے مقبوضہ کشمیر دی مظلوم عوام نال یکجہتی کیتی۔ کشمیر میڈیا سروس موجب کشمیرکونسل ای یو دے چیئرمین علی رضا سید ایں موقع تے آکھیا جو پنڄ اگست 2019 دے بھارت دے ہک پاسہ اقدام دے بعد کشمیریاں تے بھارتی مظالم کئی گناہ ودھ ڳئن۔ برسلز اچ احتجاج دا مقصد اقوام عالم تے خصوصی طور یورپی ملکاں تے زور ݙیوݨ اے جو اومقبوضہ کشمیر اچ جاری بھاتی مظالم کوں فوری بند کراون۔ احتجاجی کیمپ اچ اہم شخصیات سردار صدیق، چوہدری خالد جوشی، را مستجاب احمد، ملک اجمل، زبیراعوان، سلیم میمن، سردارنسیم ایڈوکیٹ، سردار زاہد ظاہر، شازیہ اسلم، راجہ جاوید، سید اظہر شاہ، ندیم مہر، راجہ عبدالقیوم، سید وصی شاہ اتےسید اسلم شاہ شرکت کیتی۔
