اڄوکے سیلاب توں جانی تے مالی ضیان نال نبݨݨ کیتے پاکستان تے افغانستان دی مدد کیتی ویندی پئی اے ، اقوام متحدہ

اقوام متحدہ ۔25اگست (اے پی پی):اقوام متحدہ آکھیے جو اڄوکے ودھ سارے مینھ تے سیلاب توں تھیوݨ آلے جانی و مالی ضیان نال نبݨݨ کیتے پاکستان اتے افغانستان دی مدد کیتی ویندی پئی اے۔ اقوام متحدہ دے سیکرٹری جنرل انتونیو گوترش دے ترجمان اسٹیفن دوجارک ݙسایا پاکستان اچ اقوام متحدہ دی ٹیم ساریں توں ودھ متاثرہ صوبیں بلوچستان اتے سندھ اچ حکام دی مدد کریندی پئی اے تے ہݨ تئیں اقوام متحدہ دی ٹیم سیلاب نال نبݨݨ کیتے 7 ملین امریکی ڈالردی امداد دے تحت 1,100 میٹرک ٹن خوراک ݙتی اے ۔انہاں پریس بریفنگ دے دوران ݙسائے جو وختی ضروریات دا تخمینہ لاوݨ توں بعد، مشترکہ ردعمل کوں مربوط کرݨ تے مزید وسائل دی فراہمی کیتے ھک رسپانس پلان کوں حتمی شکل ݙتی ویندی پئی اے۔ انہاں آکھیے افغانستان اچ گزریل ہفتے ودھ سارے مینھ تے سیلاب کئی صوبے متاثر کیتن ، جیں توں 8,200 توں ودھ خاندان متاثر تھئن ۔16 تے 21 اگست تئیں اچانک سیلاب توں 63 بندے ہلاک اتے 115 زخمی تھئن ، جنہاں اچ تریمتاں تے ٻال وی شامل ہن ۔ انہاں آکھیے جو تقریباً 3,400 گھراں کوں ضیان یا تباہ تھیوݨ دا تخمینہ لاتا ڳئے ، انہاں ݙسائے جو اقوام متحدہ اتے انسانی ہمدردی دی بنیاد تے امداد ݙیوݨ آلیں متاثرہ علاقیں اچ ضرورتاں دی نشاندہی کرݨ کیتے ٹیماں بھیڄن۔ انہاں آکھیے ٹیماں، خوراک، پاݨی اتے صفائی، خیمے، صحت دی فیکھ بھال دی خدمات، تے ٻئے ضروری سامان دے نال لوکاں دیاں زندگیاں بچاوݨ آلی امداد ݙیندی پئی اے ۔