لاہور۔16ستمبر(اے پی پی)وزیراعلیٰ پنجاب چولستان دے 20 ہزار مقامی کاشتکاراں کوں سرکاری زمیناں ݙیوݨ دی منظوری ݙیندے آکھیے جو 5 سالہ عارضی کاشت کیتے کوݨے دی بنیاد تے زمین الاٹ کیتی ویسی۔ اے فیصلہ انہاں اپݨی اڳواݨی اچ لاہور اچ تھیوݨ آلے ہک اجلاس اچ کیتے۔ اجلاس اچ معاون خصوصی ڈاکٹرمحمد افضل، رکن اسمبلی چودھری محمد احسن، سینئر ممبر بورڈ آف ریونیو زاہد اختر زمان، پرنسپل سیکرٹری وزیراعلیٰ محمد خان بھٹی، سابق پرنسپل سیکرٹری وزیر اعلیٰ جی ایم سکندر، ایم ڈی چولستان ڈویلپمنٹ اتھارٹی اتے متعلقہ حکام موجود ہن۔ ڈپٹی کمشنر بہاولپور ویڈیولنک تے اجلاس اچ شرکت کیتی۔ وزیراعلیٰ آکھیا جو پہلے مرحلے اچ زمیناں دی عارضی الاٹمنٹ کیتے پنجاب انفارمیشن ٹیکنالوجی بورڈ ولوں کوݨا پاتا ویسی۔ ٻئے 5 ہزار کاشتکاراں کوں ݙوڄھے مرحلے اچ چولستان اچ عارضی رہائی وہائی کیتے زمیناں ݙتیاں ویسن تاں جو علاقے اچ معاشی سرگرمیاں ودھین اتے مقامی لوکاں دے حالات سدھرن۔
