پاکستان اچ سیلاب توں 76 لکھ لوک متاثر،15 سو جاں بحق،80 لکھ بے گھر،لوکاں کنے پناہ گاہواں ناپید اتے تن دے کپڑے وی کائنی،اقوام متحدہ

اقوام متحدہ۔21ستمبر (اے پی پی):اقوام متحدہ آکھیے جو پاکستان اچ تباہ کن سیلاب توں 76 لکھ لوک متاثر تھئن ،15 سو توں ودھ جاں بحق تے تقریباً80 لکھ بے گھر تھی چکن ،صوبہ سندھ کوں جنوبی علاقہ بدستور زیر آب ہووݨ دی وجہ توں بحران دا شکار اے ۔سیلاب دے بعد امدادی سرگرمیاں اچ مصروف اقوام متحدہ دے ذیلی اداریں دے مشترکہ بیان موجب پاکستان دے قدرتی آفت توں متاثرہ علاقیں اچ جتھاں امدادی چیزاں دی ٻہوں ساری لوڑھ اے اتھاں متاثرین تئیں پجݨ وی اوکھا اے ، خاص طور تے جنوبی سندھ جتھاں ہݨ وی کئی علاقے جھکے پاݨی اچ ٻݙیے پئن ، پاکستان اچ سیلاب توں 76 لکھ لوک متاثر تھئن ،تقریباً 80 لکھ بے گھر تے 1500 توں ودھ جاں بحق تھی چکن جنہاں اچ 552 ٻال وی شامل ہن ۔انہاں آکھیے جو یواین اداریں مقامی حکام دے نال امدادی کارروائیاں دا سلسلہ جاری رکھیا ہویا اے تاں جو سارے لوکاں کیتے مناسب مقدار اچ خوراک، پناہ گاہواں تے صحت دی حسب ضرورت سہولتاں دستیاب کائنی ۔اقوام متحدہ دے ٻالاں دے حوالے نال فنڈ ( یونیسیف)دی چیف آف فیلڈ آفس بلوچستان گیریڈا بیرو کیلا ھک ٻئے زیادہ متاثرہ صوبے ( بلوچستان)دی زوم تے حالت زار بیان کریندے ہوئیں آکھیے جو اتھاں سیلاب دے نتیجے اچ سڑکاں پل وھہہ ڳئن ،میں حالی ایں زرعی علاقے توں تھی تے آئی ہاں جتھاں ایں ویلھے وی پاݨی کھڑے انہاں آکھیے جو ہݨ سیلاب متاثرہ کمیونٹیز اچ دماغی ملیریا تے ٻیاں بیماریاں کھنڈدیاں پئن جنہاں دے علاج دی دوا وی دستیاب کائنی ، لوکاں کنے سر لکاوݨ دی جاہ تے پاوݨ کیتے تن دے کپڑے وی کائنی ۔پناہ گزیناں دے حوالے نال اقوام متحدہ دے ادارے یو این ایچ سی آر دے ایشیا و پیسفیک کیتے ترجمان بابر بلوچ موجب پاکستان اچ 7.6 ملین لوک سیلاب دے نتیجے اچ بے گھر تھئن جنہاں اچوں تقریبا 6 لکھ امدادی جاہواں تے رہندے پئن ساݙا سیلاب متاثرہ علاقیں اچ 1.2 ملین امدادی چیزاں مقامی حکام تئیں پڄاوݨ دا منصوبہ اے جنہاں اچوں 10 لکھ ݙے ݙتیاں ڳئن ۔انہاں آکھیے ملک دیاں ٻہوں ساریاں جہیں خاص طور تے جنوبی سندھ تے مشرقی بلوچستان دے علاقے ہݨ وی پاݨی اچ ہن ، انہاں آکھیے ساریں توں زیادہ متاثرتھیوݨ آلے علاقیں اچ سیلاب دا پاݨی سکݨ اچ چھی مہینے لڳ سڳدن ۔