لاہور۔3اکتوبر (اے پی پی):چیف جسٹس لاہور ہائیکورٹ دی سربراہی اچ ترائے رکنی بینچ مسلم لیگ ن دی مرکزی نائب صدر مریم نواز دی پاسپورٹ واپسی کیتے دائر درخواست منظور کرڳھدی، عدالت مریم نواز دا پاسپورٹ واپس کرݨ دا حکم ݙے ݙتا ۔چیف جسٹس لاہور ہائیکورٹ محمد امیر بھٹی دی سربراہی اچ جسٹس علی باقر نجفی اتے جسٹس طارق سلیم شیخ تے مشتمل ترائے رکنی بینچ مسلم لیگ ن دی مرکزی نائب صدر مریم نواز دی درخواست تے سماعت کیتی۔گزریل سماعت تے عدالتی حکم تے نیب حکام ݙوصفحات تے مشتمل مختصر جواب داخل کرایا تے فاضل بینچ کوں ݙسایا ڳیا جو نیب کوں مریم نواز دا پاسپورٹ درکار کائنی تے نہ ہی عدالت دی طرفوں پاسپورٹ دی واپسی تے اعتراض اے۔ سوموار دے ݙینھ عدالتی سماعت تے درخواست گزار مریم نواز دے وکیل امجد پرویز پیش تھی تے عدالت توں گزریل سماعت تے پیش نہ تھیوݨ تے غیر مشروط طور تے معافی منگی جیں کوں عدالت قبول کرڳھدا ۔ عدالت نیب حکام دی طرفوں جواب داخل کراوݨ دے بعد مریم نواز دی درخواست منظور کریندے ہوئیں رجسٹرار آفس کوں پاسپورٹ واپس کرݨ دا حکم ݙے ݙتا ۔
