اسلام آباد۔3اکتوبر (اے پی پی) وزیرِ اعظم شہباز شریف اڄ سنوار کوں چھل متاثرین دی امداد دی رئیل ٹائم مانیٹرنگ کیتے ڈیش بورڈ دا افتتاح کریسن۔ وزیراعظم آفس دے میڈٰیا ونگ توں جاری بیان موجب ڈیش بورڈ دے ذریعے چھل متاثرین کوں ملݨ آلی مقامی تے بین الاقوامی امداد اتے اوندی ونݙ دی معلومات تئیں دنیا دے کہیں وی حصے توں رسائل ممکن ہوسی۔ ایندے علاوہ چھل متاثرین دی امداد اچ تعاون کیتے ویب سائٹ، ہک جامع فلڈ ریلیف مینجمنٹ سسٹم، سیلاب زدہ علاقیاں اچ امدادی کاروائیاں اچ مصروف فیلڈ ورکرز کیتے ڈیجیٹل ایپلیکیشنزاتے پالیسی تے فیصلہ سازی کیتے ایگزیکٹیو ڈیش بورڈ وی ایں فلڈ رسپانس نظام دا حصہ ہن۔ وزیراعظم ایں موقع تے خطاب وی کریسن۔
