اسلام آباد۔4اکتوبر (اے پی پی):وفاقی وزیر صحت عبدالقادر پٹیل آکھیے جو ہیلتھ کیمپس اچ ٹائیفائڈ ، جلد دیاں بیماریاں تے نمونیا سودھے ٻہوں ساریاں بیماریاں دا علاج جاری اے ،صوبائی حکومت نال رل تے عملی اقدامات کیتے کوشاں ہیسے۔ منڳل کوں آپݨے ھک بیان اچ انہاں آکھیے جو سیلاب متاثرین کیتے عملی اقدامات جاری ہن ، سیلاب متاثرین کیتے صحت دیاں سہولتاں ݙیوݨ ساݙی اولین ترجیح اے ، انہاں آکھیے خیبرپختونخوا ، سندھ ، بلوچستان اتے پنجاب اچ 48 ہیلتھ کیمپس دا انعقاد کیتا ڳئے ۔ خیبرپختونخوا دے 8 ضلعیں 16 ہیلتھ کیمپس لاتے ڳئن ،پنجاب دے ݙو ضلعیں اچ 4 ہیلتھ کیمپس دا انعقاد کیتا ڳئے ، بلوچستان دے 7 ضلعیں اچ 14 ہیلتھ کیمپس دا انعقاد کیتا ڳئے ،سندھ دے 10 ضلعیں اچ 14 ہیلتھ کیمپس دا انعقاد کیتا ڳئے جݙاں جو مجموعی طور تے 5 ہزار 602 مریضاں کوں طبی امداد ݙتی ڳئی اے ۔کیمپس اچ پنج سال توں گھٹ عمر 1281 ٻالاں کوں طبی امداد ݙتی ڳئی ، انہاں آکھیے ہیلتھ کیمپس اچ 470 ٻالاں کوں پولیو دے حفاظتی قطرے ݙتے ڳن، ہیلتھ کیمپس اچ 196 ٻالاں کوں حفاظتی ٹیکے لاتے ڳئن ،پنجاب اچ 787 مریضاں کوں طبی امداد ݙتی ڳئی ،سندھ اچ 5030 مریضاں کوں طبی امداد ݙتی ڳئی اے ۔انہاں آکھیے جو بلوچستان اچ 4389 مریضاں کوں طبی امداد ݙتی ڳئی۔
