اسلام آباد۔4اکتوبر (اے پی پی):سپیکر قومی اسمبلی راجہ پرویز اشرف نال آسٹریلوی ہائی کمشنر نیل ہاکنز منڳل کوں پارلیمنٹ ہاؤس اچ ملاقات کیتی ۔ملاقات اچ ݙوطرفہ تعلقات سودھے سانجھی دلچسپی دے ٻئے امور تے ڳالھ مہاڑ کیتی ڳئی ۔ سپیکر ایں موقع تے ڳالھ کریندے ہوئیں آکھیے جو پاکستان آسٹریلیا دے نال دوستانہ تعلقات کوں قدر دی نگاہ نال ݙیکھدے ، ݙوہیں ملکاں وچال پارلیمانی رابطے تے اقتصادی تعاون ودھاوݨ ضروری اے ۔ پاک آسٹریلیا پارلیمانی دوستی گروپ پارلیمانی سفارت کاری اچ اہم کردار ادا کریندا پئے ۔ انہاں آکھیے ݙوہیں ملکاں دی کاروباری برادری دے درمیان رابطیں دا ودھارا ضروری اے ،پاکستان کوں اڄوکے تباہ کن سیلاب نال وݙے پیمانے تے جانی و مالی ضیان چاوݨا پئے ۔11 توں 15 اکتوبر تئیں روانڈا اچ 145ویں بین الپارلیمانی یونین (آئی پی یو) دی جنرل اسمبلی اجلاس منعقد تھیوݨ ویندا پئے ،ایں اجلاس اچ پاکستان دی قومی اسمبلی موسمیاتی تبدیلیاں توں تھیوݨ آلے ضیان دے ازالے کیتے ہنگامی قرارداد پیش کرݨ دا مطالبہ کیتے ۔ قرارداد دا مقصد پاکستان جیہے ترقی پذیر ملکاں اچ موسمیاتی تبدیلیاں توں تھیوݨ آلے ناقابل تلافی ضیان دے ازالے کیتے عالمی فنڈ کرݨا اے۔سپیکر پاکستان اچ سیلاب متاثرین کیتے مدد اتے بحالی کیتے آسٹریلوی حکومت دے تعاون دی تعریف کیتی ۔ آسٹریلوی ہائی کمشنر آکھیے آسٹریلیا پاکستان کوں آپݨا بااعتماد دوست اتے اہم اقتصادی شراکت دار سمجھدے ،ساݙے سرمایہ کار پاکستان اچ سرمایہ کاری دے خواہشمند ہن۔ آسٹریلیا موسمیاتی بحران نال نبݨݨ کیتے آئی پی یو دے ذریعے عالمی فنڈ دے قیام کیتے قومی اسمبلی آف پاکستان دے مطالبے دی حمایت دا یقین ݙویندے۔
