چھل متاثرین کیتے پاکستان اتے اقوام متحدہ دی سانجھی نظر ثانی شدہ فلیش 2022 اپیل شروع تھی ڳئی، پاکستان دے چھل متاثرین دی امداد اتے بحالی کیتے عالمی سطح تے مربوط کوششاں دی لوڑھ اے، حنا ربانی کھر

جنیوا۔4اکتوبر (اے پی پی) چھل متاثرین کیتے پاکستان اتے اقوام متحدہ دی سانجھی نظر ثانی شدہ فلیش 2022 اپیل منگل کوں جنیوا اچ شروع تھی ڳئی اے۔ ماحولیاتی تبدیلی پاروں پاکستان دے ہولناک چھل متاثرین دی امداد اتے بحالی کیتے اے مہم پاکستان دی حکومت اتے اقوام متحدہ شروع کیتی اے۔ پاکستان ولوں ایں مہم اچ وفاقی وزیر ماحولیاتی تبدیلی شیری رحمنٰ، وفاقی وزیر اقتصادی امور اتے وزیر مملکت برائے امور خارجہ حنا ربانی کھر شریک تھئی۔ تقریب اچ اقوام متحدہ دے انڈر سیکرٹری جنرل مارٹن گرفتھ، پاکستان اچ اقوام متحدہ دے نمائندہ جولین ہارنس، عالمی ادارہ صحت (ڈبلیو ایچ او) دے ڈائریکٹر جنرل ڈاکٹر ٹیڈروس ایڈہانوم ، اقوام متحدہ دی ٻئی ذیلی تنظیماں اتے امدادی اداریاں دے نمائندے شریک تھیے۔ چھل متاثرین کیتے پاکستان اتے اقوام متحدہ دی سانجھی نظر ثانی فلیش اپیل دے موقع تے خطاب کریندیں ہوئیں وزیر مملکت برائے امور خارجہ حنا ربانی کھر آکھیا جو چھل متاثرین دی مدد کیتے دنیا اڳوں آوے۔ حکومت سارے وسائل لا تے متاثرین دی بحالی کیتے کم کریندی پئی اے۔ اساں کوں ہنگامی بنیاداں تے دوائیں اتے طبی سہولتاں دی لوڑھ اے۔ متاثرین کوں سردی توں بچاوݨ کیتے اقدامات کرݨے پوسن۔اقوام متحدہ دے انڈر سیکرٹری جنرل مارٹن گرفتھ تقریب توں خطاب کریندیں ہوئیں آکھیا جو پاکستان کوں چھل دی سخت تباہ کاریاں دا سامݨا اے۔ ہولناک چھل پاروں متاثرین دی دی بحالی کیتے عالمی برادری کوں مدد کرݨی پوسی۔