لاہور۔4اکتوبر(اے پی پی)وزیراعلیٰ پنجاب چودھری پرویز الٰہی صوبے اچ سارے صحت دے منصوبے تیکھے مکمل کرݨ دی ہدایت کریندے سرکاری ہسپتالاں کوں سولر توانائی تے منتقل کرݨ کیتے قابل عمل پلان منڳ ڳھدے اتے آکھیے جو گنگارام ہسپتال دا زچہ وبچہ بلاک ایں مہینے مکمل کیتا ونڄے۔ او لاہور اچ صوبے دے زیر تکمیل صحت منصوبیاں بارے جائزہ اجلاس دی اڳواݨی کریندے پئے ہن۔ وزیراعلیٰ ہسپتالاں دی سولرائزیشن دے پروگرام دا مکمل اندازہ لاوݨ دیی ہدایت کریندے جوبلی ٹاؤن اچ ڈینٹل ہسپتال کیتے فنڈز ݙیوݨ دی منظوری ݙتی اتے انسٹی ٹیوٹ آف چائلڈ ہیلتھ کوں پبلک پرائیوٹ پارٹنر شپ نال مکمل کرݨ دا آکھیا۔ وزیر اعلیٰ ڈی ایچ کیوگوجرانوالہ اتے ساہیوال دی اپ گریڈیشن مکمل کرݨ دی ہدایت کیتی۔ وزیراعلیٰ فتح محمد بزدار انسٹی ٹیوٹ آف کارڈیالوجی ڈی جی خان دے آؤٹ ڈور تے ایمرجنسی بلاک کوں تیکھے بحال کرݨ دا حکم ݙتے۔ اجلاس اچ نشتر ہسپتال ملتان اچ پیٹ سکین اتے سائیکلوٹران مشین لاوݨ کیتے فنڈز دی وی منظوری ݙتی گئی۔
