ملتان۔5اکتوبر (اے پی پی):ڈیرہ غازی خان تے راجن پور اچ سیلاب تے ودھ سارے مینھ پاروں متاثرہ سکولاں دی نویں سروں تعمیر تے تعلیمی سرگرمیاں دی بحالی کیتے محکمہ سکول ایجوکیشن جنوبی پنجاب اقدامات تکھے کرݙتن ، ایں سلسلے اچ ضیان دا تخمینہ لاوݨ تے متاثرہ سکولاں دی بحالی دا پلان بݨاوݨ کیتے ایڈیشنل سیکرٹری آغا ظہیر عباس شیرازی دی نگرانی اچ ھک خصوصی سیل ایجوکیشن سیکرٹریٹ اچ کم کریندا پئے ۔ سیلاب متاثرہ علاقیں اچ ٻالاں کوں تعلیمی سہولتاں ݙیوݨ بارے لائحہ عمل تیار کیتا ڳئے جیں تے عمل درآمد کرݨ اچ بین الاقوامی ادارہ یونیسیف وی محکمہ سکول ایجوکیشن جنوبی پنجاب دی معاونت کریندا پئے ۔ سیلاب تے ودھ سارے مینھ پاروں متاثرہ سکولاں دے حوالے نال تفصیلات ݙسیندے ہوئیں ایڈیشنل سیکرٹری آغا ظہیر عباس شیرازی آکھیے جو سیلاب توں ضلع ڈیرہ غازی خان دے 46 سکولاں کوں مکمل اتے 325 سکولاں کوں جزوی ضیان پڄے جݙاں جو ضلع راجن پور اچ 12 سکول مکمل اتے 528 سکول جزوی تباہ حالی دا شکار تھئن ۔ انہاں آکھیے متاثرہ سکولاں دی بحالی، سروے اتے ضیان دے تخمینے دے نال نال ابتدائی کیمپنگ تے آبادکاری کیتے محکمہ تعلیم دے ضلعی دفتر بھرپور کردار ادا کیتے۔ ایں ویلھے ضلع ڈیرہ غازی خان دے 13 اتے راجن پور دےچارسکول اپݨی عمارتاں اچ کائنی ، یونیسیف دی معاونت نال محکمہ سکول ایجوکیشن جنوبی پنجاب 20 سکولاں اچ خیمیں دے کلاس رومز بݨا تے تعلیمی سلسلہ بحال کیتے ۔ آغا ظہیر عباس شیرازی آکھیے جو 42 دے نیڑے ایہو سویں سکول ہن جنہاں اچ عارضی لرننگ سنٹر دا اہتمام کیتا ڳئے ساݙی کوشش اے جو سیلاب متاثرہ علاقیں اچ بالاں دے سکولاں تں ڈراپ آؤٹ کوں روکیا ونڄے ۔
