واشنگٹن۔5اکتوبر (اے پی پی):امریکا اچ پاکستان دے سفیر مسعود خان فنڈ ریزنگ تقریب اچ پاکستان اچ سیلاب توں تھیوݨ آلیاں تباہی تے ڳالھ کریندے ہوئیں آکھیے جو سیلاب پاروں لکھاں لوک بے گھر تھی ڳئن جنہاں اچ تریمتاں تے ٻالیں کوں ٻہوں اوکھ تھیندی پئی اے جیڑھے جو ایں ویلھے عارضی پناہ گاہواں اچ رہندے پئن ۔اے فنڈ ریزنگ تقریب کینیڈا دی چیریٹی تنظیم ریفیوجی گرلز ورلڈ وائڈ(آر جی ڈبلیو)دے زیراہتمام منعقد کیتی ڳئی جیڑھی جو ترکی، فلسطین، یوکرین، پاکستان اتے کینیڈا اچ پناہ گزین تریمتاں دی بہتری کیتے کم کریندی پئی اے ۔ پاکستانی سفارتخانے توں جاری پریس ریلیز موجب انہاں آکھیے جو ماحولیاتی تبدیلیاں پاروں پاکستان اچ سیلاب دے متاثرہ لوکاں تے عارضی پناہ گاہواں اچ رہݨ تے مجبور ہیسے جنہاں کوں ایں ویلھے شدید مشکلات تے کئی مصیبتاں دا سامݨا اے تے انہاں کوں اوکھے ویلھے بین الاقوامی برادری دی فوری توجہ تے طویل مدتی عزم دی لوڑھ اے ۔تقریب اچ اہم پاکستانی شخصیات، مخیر حضرات اتے امریکی محکمہ خارجہ تے پاکستانی سفارتخانے دے عہدیداراں شرکت کیتی ۔ پاکستانی سفیر آکھیے جو سیلاب پاروں 3کروڑ 30لکھ لوک متاثر تھئن جنہاں اچوں 70فیصد توں ودھ تریمتاں تے ٻال شامل ہن جݙاں جو 6لکھ حاملہ تریمتاں اچوں 2ہزار تریمتاں روزانہ غیر محفوظ اتے غیر صحت مند حالات اچ ٻال ڄݨیندیاں پئن ۔
