وفاقی وزیر خزانہ اسحاق ڈار آکھیے جو اتحادی حکومت اپݨی ذمہ داریاں پوری کریسی، ایٹمی دھماکیاں دے بعد وی مالی مسائل دا مؤثر حل کݙھیا ہا، بانڈ بارے ادائیگی وی ویلھے تے کریسوں، قرضیاں دی ری شیڈولنگ کیتے پیرس کلب نہ ویسوں، تاجر برادری دے تحفظات دور کریسوں، 50 ہزار ڈالرز تئیں دی ایل سیز دی ادائیگی کریندے پئے ہیں۔ اے ڳآلھ انہاں اسلام آباد اچ نیوز کانفرنس کریندے آکھی۔ اسحاق ڈار آکھیا جو ایل سیز بارے تاجر برادری دے تحفظات اتے شکایات دا ازالہ کریسوں، پچھلی حکومت پاروں ملک مسائل دا شکار تھئے، گورنر اسٹیٹ بینک ادائیگاں بارے ڈیٹا ݙتے۔ انہاں آکھیا جو 50 ہزار ڈالرز تئیں جیڑھی وی رکی ہوئی ادائیڳی اے او ریلیز تھی ویسن، 5 برآمدی صنعتاں دے مسائل حل کیتن، اساں اپݨے سارے فیصلاں تے عمل کریسوں اتے عالمی ادارے وی ساݙے فیصلاں دی تائید کریسن۔
