اسلام آباد۔11اکتوبر (اے پی پی) صدر مملکت ڈاکٹر عارف علوی آکھیا جو سیاق و سباق توں ہٹ تے بیانات کوں پیش کرݨ پہلے توں تقسیم شدہ ماحول اچ ٻئے چیلنجز دا باعث ٻݨدے۔ منگل کوں ایوان صدر دے پریس ونگ توں جاری بیان موجب صدر مملکت ڈاکٹر عارف علوی میڈیا اچ شائع /نشر تھیوݨ آلی خبراں دا سخت نوٹس ڳھدے جئیں اچ سنوار کوں “آج “ٹی وی دی اینکر عاصمہ شیرازی نال انٹرویو اچ “سائفر ” بارے صدر دے بیان کوں مکمل طور سیاق و سباق توں ہٹ تے پیش کیتا ڳئے۔ آپݨے انٹرویو اچ صدرمملکت نشابر آکھیا ہئی جو انہاں کوں سازش بارے شبہ “suspicion” اے جڈانجو ایندا حتمی فیصلہ پوری تحقیقات دے بعد کیتا ونڄ سڳدے۔ انہاں آکھیا جو چیف جسٹس آف پاکستان کوں خط لکھݨ توں ہݨ تئیں انہاں دے موقف اچ کوئی تبدیلی نی آئی اتے ایں خط اچ انہاں سپریم کورٹ دے معاملے دی پوری انکوائری کرݨ دی درخواست کیتی ہئی کیونجو انہاں کوں پکا یقین اے جو ایں معاملے تے تحقیقات تھیوݨی چاہیدی اے۔ صدر مملکت ایں معاملے کوں سپریم کورٹ اچ ایں کیتے کائنا ٻھیجا ہئی جو انہاں کوں سازش بارے کوئی شک و شبہ کائنا ہئی بلکہ اے معاملہ ملک دے سابق وزیراعظم ولوں چاتا ڳیا ہئی۔ ایں کیتے سارے دستیاب واقعاتی شواہد سمیت پورے معاملے دی غیر جانبدارانہ تحقیقات ضروری ہن۔ بدقسمتی دی ڳالھ اے جو صدرمملکت دے الفاظ کوں ہک انتہائی سنجیدہ معاملے تے تروڑ مروڑ تے پیش کیتا ڳئے جئیں دے سنگین اثرات تھین۔
