اسلام آباد۔14اکتوبر(اے پی پی) پیپلز پارٹی صوبائی ممبر کونسل پنجاب حسین احمد مدنی اے پی پی سرائیکی نیوز سروس نال ڳالھ مہاڑ کریندے ہوئیں آکھیے بہاولپور شہر دے چپے چپے ہر ڳلی تے محلے دا سیوریج سسٹم ٻہوں خراب تھی چکئے۔ انہاں آکھیے پچھلے ݙینھاں اساں ایں سلسلے اچ کمشنر بہاولپور دے نال ملاقات کیتی ہئی کمشنر بہاول پور دا آکھݨ ہئی جو اساں ایں سیوریج سسٹم دا پورا سروے کرائے تے حکومت کوں ایندا گھٹ ودھ 6 ارب روپے دے خرچے دا حساب لا ݙتے ۔ جے حکومت اے فنڈز ݙے ݙیوے تاں حکومت پنجاب کوں اتھاں دے لوک وی شاباش ݙیسن ۔ انہاں آکھیے جو ساݙے لوکاں دا اے ٻہوں پراݨا مسئلہ حل تھی ویسی ۔ بہاول پور دے لوک گٹراں دے پاݨی توں کافی پریشان ہن ، انہاں دے گھراں دے اندر پاݨی آویندے تے پیوݨ دے پاݨی آلے نلکے وچوں وی گندا پاݨی آندا پئے تے ایندے ٻہوں خراب اثرات پوسن۔ انہاں آکھیے انویں تاں بہاولپور شہر دے ٻئے کافی سارے مسئلے ہن پئے ایں ویلھے ساریں توں وݙا مسئلہ سیوریج تے اوندے گندے پاݨی دا اے جیڑھا جو پیوݨ آلے پاݨی ول رل ڳئے۔ انہاں حکومت توں مطالبہ کیتے جو مہربانی کرتے ایندے وختی پیسے ریلیز کیتے ونڄن تاں جو سیوریج دے سسٹم کوں ٹھیک کرتے اتھاں دے لوکاں کوں سکھ دا ساہ ݙتا ونڄ سڳیجے
