ملک اچ جاری سیاسی پولرائزیشن تے سیلاب دیاں تباہ کاریاں پاروں انتظامیہ اتے سیکیورٹی اداریں کوں مزید تکڑا تے خبردار رہݨ دی لوڑھ اے ، الیکشن دا شفاف تے غیر جانبدارانہ انعقاد یقینی بݨایا ونڄ سڳے ،چیف الیکشن کمشنر سکندر سلطان راجہ

اسلام آباد۔15اکتوبر(اے پی پی):چیف الیکشن کمشنر سکندر سلطان راجہ پنجاب، خیبرپختونخواتے سندھ دے چیف سیکرٹری و آئی جی کوں مراسلہ جاری کریندے ہوئیں انہاں توں صوبائی اسمبلی پنجاب دے 3 اتے قومی اسمبلی دے 8 حلقیں اچ اتوارکوں تھیوݨ آلے انتخابات دی سیکیورٹی،ووٹرز ، پولنگ عملے، امیدواران اتے  سیاسی جماعتاں کوں پر امن ماحول ݙیوݨ تے صوبائی انتظامیہ کوں فول پروف سیکیورٹی ݙیوݨ دی ہدایت کیتی اے ۔ترجمان الیکشن کمشن دی طرفوں جاری اعلامیہ موجب مراسلہ اچ آکھیا ڳئے جو ملک اچ جاری سیاسی پولرائزیشن اتے سیلاب دی تباہ کاریاں دے پیش نظر انتظامیہ اتے سیکیورٹی اداریں کوں مزید چوکس و خبردار رہݨ دی لوڑھ اے تاں جو الیکشن دا شفاف تے غیر جانبدارانہ انعقاد یقینی بݨایا ونڄ سڳے۔ مراسلہ چیف سیکرٹری پنجاب عبداللہ سنبل، آئی جی پنجاب فیصل شاہکار، چیف سیکریٹری سندھ سہیل راچپوت، آئی جی سندھ غلام نبی میمن، چیف سیکریٹری خیبرپختونخوا شہزاد بنگش اتے آئی جی خیبرپختونخوا معظم جاہ دے ناویں لکھیا ڳئے ۔چیف الیکشن کمشنر سکندر سلطان راجہ پولنگ دے سامان دی ونڈ تے ٻئے انتظامات دی نگرانی کریندے پئن ۔