اسلام آباد۔15اکتوبر (اے پی پی):وزیراعظم شہباز شریف آکھیے پاکستان خودداری تے عزت نال رہݨ تے ترقی و خوشحالی دا انقلاب گھں آوݨ کیتے وجود اچ آئے ، بدقسمتی نال سابق وزیراعظم معاشرے اچ کوڑ مارݨ ، الزام تراشی اتے ݙینھ رات قوم ، ملک تے اداریں دے خلاف سازش کرݨ دی روایت پروان چڑھائی جیں دا عملی مظاہرہ مسجد نبویۖ سودھے مختلف ملکاں اچ ݙیکھݨ اچ آئے ، ایں رویے معاشرہ کوں تقسیم در تقسیم کرݙتے ، مفتی محمود کانفرنس دے شرکاء دے جذبہ توں اے امید پیدا تھئی اے جو اے لوک ایں سوچ دے خلاف ٻن ٻدھݨ اچ کامیاب تھیسن ، او ہفتے کوں کنونشن سنٹر اچ مولانا مفتی محمود کانفرنس توں خطاب کریندے پئے ہن ۔ کانفرنس توں جمعیت علماء اسلام ف دے سربراہ مولانا فضل الرحمان، عوامی نیشنل پارٹی دے پارلیمانی لیڈر امیر حیدر خان ہوتی، پیپلز پارٹی دے رہنما تے سابق چیئرمین سینیٹ میاں رضا ربانی ، وفاقی وزیر مولانا اسد محمود تے ٻئیں خطاب کیتا ۔ وزیراعظم کانفرنس دے بہترین انعقاد تے منتظمین کوں مبارخ ݙیندے ہوئیں آکھیے جو اے عظیم الشان کانفرنس عظیم عالم دین، محقق اتے رہبر دی شان اچ منعقد کیتی ڳئی اے ، جنہاں ملک تے قوم کیتے ودھ ساری خدمات انجام ݙتن، میں علماء کرام دی خدمات کوں قدر دی نگاہ نال ݙیکھݨ آلا بندہ ہاں ، مفتی محمود ھک سادہ طبعیت اتے سادہ زندگی گزارݨ آلے بندے ہن ، انہاں دی زندگی دا مقصد علم و تدریس کوں ودھارا ݙیوݨ ہئی ۔ قاسم العلوم ملتان توں ہزاراں طالب علماں کوں تعلیم دے زیور توں آراستہ کیتا۔
