ملتان۔16اکتوبر (اے پی پی):قومی اسمبلی دے این اے 157 ملتان اچ ضمنی انتخاب کیتے اتوار دی سویل 8 وڄے سخت سکیورٹی انتظامات اچ پولنگ دا عمل شروع تھیا۔حلقہ این اے157 اچ رجسٹرڈ ووٹاں دی تعداد4 لکھ 62 ہزار205 اے جیں اچ مرد ووٹرز دی تعداد2 لکھ 47ہزار 920 اتے تریمت ووٹرز دی تعداد2لکھ14ہزار285 اے۔ انتخابات دے پرامن انعقاد کیتے حلقے دیان 38یونین کونسلاں اچ 264پولنگ سٹیشنز بݨائے ڳئن جیں اچ 52مرد ،49 تریمت تے 163مشترکہ پولنگ سٹیشنز شامل ہن۔ایں حلقے اچ اٹھ امیدوار الیکشن لڑدے پئن جنہاں اچ ترائے امیدوارپارٹی ٹکٹ تے انتخاب لڑدے پئن جݙان جو پنج امیدوار آزاد ہن۔ ایں حلقے اچ اصل مقابلہ پاکستان ڈیموکریٹک موومنٹ (پی ڈی ایم ) دے متفقہ امیدوار اتے سابق وزیراعظم تے سینیٹر سید یوسف رضاگیلانی دے صاحبزادے سید علی موسی گیلانی اتے پاکستان تحریک انصاف دے مرکزی رہنماءشاہ محمود قریشی دی صاحبزادی مہربانو قریشی دے درمیان اے۔ این اے157دی نشست مخدوم زین قریشی دے مستعفی تھیوݨ توں بعد خالی تھئی ہئی ۔ واضح رہے جو الیکشن 2018 اچ مخدوم زین حسین 77 ہزار 373 ووٹ گھن تے قومی اسمبلی اچ کامیاب تھئے ہن جݙاں جو پیپلزپارٹی دے امیدوار سید علی موسیٰ گیلانی 70,778اتے پاکستان مسلم لیگ(ن) دے عبدالغفار ڈوگر 62,082 ووٹ ڳھدے ہن ۔
