اسلام آباد۔19اکتوبر(اے پی پی) وزیراعظم محمد شہبازشریف چینی ڈیزاسٹر مینجمنٹ دے ماہرین دے خصوصی وفد دے سیلاب توں متاثرہ علاقیں دے دورے دا خیر مقدم کریندے ہوئیں ایں توقع دا اظہار کیتے جو قدرتی آفتاں دے دوران ریسکیو تے ریلیف دے حوالے نال چینی ماہرین دا تجربہ پاکستان کیتے مستقبل اچ وی مفید ثابت تھیسی ۔وزیراعظم آفس دے میڈیاونگ توں جاری بیان موجب وزیراعظم شہباز شریف نال اسلام آباد اچ چینی ڈیزاسٹر مینجمنٹ دے ماہرین دے خصوصی وفد چین دے ڈیپارٹمنٹ آف فلڈ کنٹرول، وزارتِ ایمرجنسی منیجمنٹ دے ایمرجنسی کمانڈنگ آفیسرژو ژیان بیائودی قیادت اچ ملاقات کیتی جیں اچ وفاقی وزرااحسن اقبال، شیری رحمن، معاون خصوصی ظفر الدین محمود، چیئرمین این ڈی ایم اے تے چیئرمین این ایف آر سی سی دے علاوہ متعلقہ حکام شرکت کیتی۔وزیراعظم آکھیے او چینی وفد کوں تجویز ݙیسن جو وطن واپسی توں پہلے پاکستانی حکومت نال ڈیزاسٹر مینجمنٹ اچ تعاون دے معاہدے تے دستخط کرتے ونڄن۔ انہاں آپݨی تے آپݨی قوم دی طرفوں اوکھے ویلھے مدد تے چینی قیادت اتے چین دے عوام دا شکریہ ادا کیتے ۔وزیراعظم آکھیے جو چین پاکستان دی ہر اوکھے ویلھے مدد کیتی اے پاکستان تے چین دے پراݨے تعلقات دی عمدہ مثال اے۔انہاں آکھیے جو سندھ اتے بلوچستان دے کئی علاقے حالی وی پاݨٰی وچ ہن تے پاݨی توں تھیوݨں آلیاں بیماریاں نویں چیلنجز گھن آسن ۔انہاں پاکستان اتے چین اچ کم کرݨ آلی چینی کمپنیاں دی طرفوں وزیر اعظم فلڈ ریلیف فنڈ اچ عطیات تے انہاں دا شکریہ ادا کیتے ۔ملاقات اچ وفد وزیراعظم کوں اپݨے دورہ پاکستان بارے ݙسیا تے اے وی آکھیے جو چینی وفد سیلاب متعلق ماہرین تے مشتمل اے جیڑھا جو پاکستان دے سیلاب متاثرہ علاقیں بالخصوص سندھ دا دورہ کرتے آئے۔وفد پاکستان تے چین وچال سیلاب دی پیش گوئی ایندے اثرات کوں گھٹ کرݨ کیتے انفراسٹرکچر دی تعمیر اچ پاکستان کوں ٻہوں گھٹ مدت، ادھ تے لمبی مدت دے منصوبیں تے تکنیکی معاونت ݙیسی ۔چینی وفد متعلقہ پاکستانی اداریں و حکام نال تعاون کیتے ورکنگ گروپ تشکیل ݙتن تے 21 اکتوبر کوں این ڈی ایم اے کوں متاثرہ علاقیں اچ لوکاں تے انفراسٹرکچر دی بحالی کیتے تفصیلی پلان اتے رپورٹ پیش کریسی۔
