اسلام آباد۔19اکتوبر(اے پی پی):وزیراعظم محمد شہباز شریف ماحولیاتی تبدیلیاں دا مقابلہ کرݨ دی صلاحیت دے حامل گھراں تے انفراسٹرکچر دی تعمیر کیتے قومی منصوبہ دی ہدایت کریندے ہوئیں آکھیے جوپاکستان کوں خشک سالی دے خطرے توں بچاوݨا اے ، مشترکہ مفادات کونسل دی طرز تے بݨائی ڳئی موسمیاتی تبدیلی کونسل کوں مکمل فعال ادارہ بݨایا ونڄے ، جامع منصوبہ دی تیاری کیتے بہترین ماہرین تے مشتمل کمیٹی تشکیل ݙتی ونڄے ۔ ٻدھ کوں وزیراعظم آفس دے میڈیاونگ توں جاری بیان موجب وزیراعظم اے ہدایات ماحولیاتی تبدیلی کونسل دے پہلے اپݨی زیرصدارت اجلاس اچ ݙتن ۔2017 دے بعد وزیراعظم شہباز شریف ماحولیاتی تبدیلی کونسل دے پہلے اجلاس دی صدارت نال تاریخ رقم کرݙتی ۔ وزیراعظم سیلاب متاثرین دی بحالی اتے مستقبل اچ موسمی خطرات توں بچݨ دے حوالے نال وݙا فیصلہ کریندے ہوئیں ماحولیاتی تبدیلیاں دا مقابلہ کرݨ دی صلاحیت دے حامل گھراں تے انفراسٹرکچر دی تعمیر کیتے نیشنل پلان بݨاوݨ دی ہدایت کیت ، انہاں اے ہدایت کیتی اے جو ماحولیاتی تبدیلیاں دے مطابق رہݨ سہݨ تے تعمیرات اختیار کرݨ کیتے اقدامات تجویز کیتے ونڄن ، ماحولیاتی مسئلیں نال نبݨݨ تے وختی تیار کیتے مستقل بنیاداں تے وفاقی تے سارے صوبائی حکومتاں دا اشتراک عمل تیار کیتا ونڄے ۔ ماحولیاتی تبدیلی کونسل مشترکہ مفادات کونسل دی طرز تے بݨائی ڳئی ہئی جیں اچ وفاق اتے سارے صوبائی متعلقہ سٹیک ہولڈرز شامل ہن۔ وزیراعظم شہباز شریف ماحولیاتی تبدیلی کونسل کوں مکمل فعال ادارہ بݨاوݨ دی ہدایات جاری کریندے ہوئیں آکھیے جو مستقبل اچ موسمیاتی خطرات دی نشاندہی اتے قومی سطح تے جامع پلان تیار کیتا ونڄے ۔ وزیراعظم جامع پلان دی تیاری کیتے ھک بہترین ماہرین تے مشتمل کمیٹی بݨاوݨ دا حکم ݙے ݙتا ۔ وزیراعظم آکھیے جو ماحولیاتی تبدیلیاں تباہ کن سیلاب گھن آندیاں پئن ، سندھ اتے بلوچستان اچ تباہی تازہ مثال اے۔ کاربن دے ھک فیصد توں وی گھٹ حصہ ہووݨ دے باوجود پاکستان ساریں توں ودھ متاثر تھیوݨ آلے اولین 10 ملکاں اچوں اے ۔
