اسلام آباد۔19اکتوبر(اے پی پی)پاکستان سرائیکی پارٹی دے قائدین سید علی موسی گیلانی کوں رکن اسمبلی ٻݨݨ تے مبارک ݙتی اے۔ حلقے اچ سابق وزیراعظم سید یوسف رضا گیلانی دے آکھیے تے پاکستان سرائیکی پارٹی دی قیادت ضمنی انتخابات اچ علی موسی گیلانی دی حمایت دا اعلان کیتا ہا۔ سرائیکی اڳواݨاݨ امید کیتی جو سید یوسف رضا گیلانی اڳیں آلی کار سرائیکی وسیب دے واسیاں دے حق حکمرانی ” سرائیکی صوبہ ” کیتے جدوجہد ٹوری رکھسن، علی موسی گیلانی قومی اسمبلی اچ اپݨی پہلی تقریر اچ سرائیکی وسیب دی سنڄاݨ دی بنیاد تے صوبہ دا مطالبہ کریسن۔ پاکستان سرائیکی پارٹی دے قائدین رلے سید یوسف رضا گیلانی ملتان اچ مشترکہ پریس کانفرنس کیتی اتے سرائیکی صوبہ کیتے اپݨا عزم دوہرایا اتے سرائیکی صوبہ کیتے رکاوٹاں سودھا مسلیاں دا حل وی ݙسایا۔ انہاں آکھیا جو میں سرائیکی صوبہ ٻݨوا تے پاکستان سرائیکی پارٹی دی حمایت دا احسان لہیساں۔ پاکستان سرائیکی پارٹی دی چیئرپرسن ڈاکٹر نخبہ تاج لنگاہ آکھیے جو اساں سید یوسف رضا گیلانی اتے پاکستان پیپلزپارٹی نال صوبہ سرائیکیستان دے قیام کیتے عملی جدو جہد دا مطالبہ کریندے ہیں جو پیپلزپارٹی اپݨی اتحادی جماعتاں نال صوبہ سرائیکیستان دا منواوے اتے سنجیدہ کوششاں کیتاں ونڄن، زباناں کیتے لینگوئج کمیشن ٻݨݨا چاہیدے جو سرائیکیاں کوں سنڄاݨ ملے۔
