اسلام آباد۔19اکتوبر(اے پی پی)اکاؤنٹیبیلیٹی لیب پاکستان ولوں نیشنل پریس کلب اچ اسلام آباد دے صحافیاں کیتے اظہار رائے دی آزادی، جعلی خبراں دے اثرات تے میڈیا دے کردار تے ہک آگاہی سیشن تھیا جیندے اچ مقررین معاشرے اتے خاص طور تے اساڈے نینگراں، جعلی خبراں، غلط معلومات دے بنیادی محرکات اتے انھاں دے اثرات تے گالھ مہاڑ کیتی۔ مقررین اچ ڈین سوشل سائینسز اسلامک انٹرنیشنل یونیورسٹی ڈاکٹر ظفر اقبال اسلام آباد، ڈپٹی ڈائریکٹر پریس انفارمیشن ظل ہما، بیورو چیف ڈان نیوز افتحارحسین شیرازی اتے سابق سینئیر وائس پریزیڈنٹ نیشنل پریس کلب اسلام آباد ڈاکٹر سعدیہ کمال شامل ہن۔ سیشن اچ میڈیا دے مقامی نمائندے، سول سوسائٹی اتے مختلف یونیورسٹیاں دے طلباء وی شرکت کیتی۔ ڈاکٹر سعدیہ کمال شرکاء دا خیر مقدم کریندے اہم معاملے تے سیشن رکھݨ دی تعریف کیتی۔ انہاں آکھیا جو لوک اہم معلومات تے فیصلیاں سانگے میڈیا تے انحصار کریندن تاں جو رپورٹنگ اچ شفافیت یقینی ٻݨاوݨ صحافیاں دی ذمے واری اے، سوشل میڈیا پاروں جعلی خبراں کھنڈدن، سارے صحافتی ادارے تے بالخصوص صحافیاں دی انفرادی طور تے ذمے واری ڈھیر ودھ گئی اے۔ مس ظل ہما آکھیا جو اظہار رائے دی آزادی ہر شہری دا بنیادی حق اے جو، حکومت ایں بارے اسٹیک ہولڈرز نال مشاورت ودھاوے جو مناسب فریم ورک اتے قوانین سامݨے آون۔ ڈاکٹر ظفر اقبال دا آکھݨ ہا جو پوری دنیا دی طرح پاکستان اچ وی جعلی خبراں تے غلط معلومات عوامی اظہار رائے تے ملک وچ جمہوری اقدار کیتے ہک خطرہ ٻݨ چکی اے، آن لائن ڈس انفارمیشن مستند معلومات تئیں رسائی، سیاسی پولرائزیشن، سوشل میڈیا دا غلط استعمال، مین اسٹریم میڈیا تے عدم اعتماد تے نفرت انگیز مواد جہیں مسئلے پیدا کیتن، کووڈ-19 جھیں عالمی وباء وچال افواہاں اتے غلط معلومات بہوں منفی کردار ادا کیتے۔ ڈان نیوز دے بیورو چیف افتحار حسین شیرازی آکھیا جو ٹیکنالوجی، سوشل میڈیا کمرشلزم اتے مقابلے دے ایں دور اچ جعلی خبراں تے غلط معلومات صحافتی مسائل اچ ودھا ݙتن، انھاں ہک ایجھے فورم بنڑاونڑ تے زور ڈتا جیندے اچ سارے اسٹیک ہولڈرز حکومت سودھے میڈیا، سول سوسائٹی اتے عوامی نمائندیاں تے گالھ کرن اتے سارے مسئلیاں دی گالھ مہاڑ کر سگن تے اینجھا حل ڈیون جیڑھاعمل کرݨ دے قابل ہووے۔
