اسلام آباد۔20اکتوبر(اے پی پی)سینئر صحافی افتخارشیرازی اے پی پی سرائیکی نیوز سروس نال ڳالھ مہاڑ کریندے ہوئیں آکھیے جو علاقائی میڈیا دا ساریں توں وݙا مسئلہ اے ہے جو اتھاں کم کرݨ آلے صحافیاں دی تعلیمی قابلیت گھٹ ہوندی اے تے ݙوجھا انہاں دی پروفیشنل تربیت نی ڈتی ویندی ایں واسطے اتھاں دی صحافت دا معیار چنڳاں نی ہوندا ۔انہاں آکھیے جو دانستہ طور تے غیر دانستہ طور تے غیر ذمہ دارانہ صحافت کیتی ویندی اے۔ انہاں آکھیے جواتھاں مثال دے طور تے سیلاب متعلق غیر ذمہ دارانہ رپورٹنگ کیتی ڳئی اے ایندی ݙو وجوہات ہن اوندے اچ ھک اے ہے جو میڈیا دے ٻہوں سارے ادارے انہاں چیزاں کوں اہمیت نی ݙیندے تےایں توں علاوہ جیڑھا میڈیا دے اداریاں اچ علاقائی نمائندہ رکھیا ویندے اوندی تعلیمی قابلیت وی کوں وی سامنڑے رکھنڑاں چاہیدا اے تے ݙوجھا اوندا صحافتی تجربہ وی مناسب ہووݨا ضروری اے ۔اوندے بعد ای بندے کوں نمائندگی ݙتی ونڄے۔انہاں ایں حوالے نال بیا آکھیا جومسیلہ اے ہے جو انہاں ڳالھیں کوں نظر انداز کرݙتا ویندے تے بغیر قابلیت تجربے دے نمائندہ مقرر کرݙتا ویندے ایندے بعد جیڑھی خبر یا مواد او بھجیندے اونکوں چیک نی کیتا ویندا جواو درست وی ہے یا کائناں تے اوں توں ودھ پریشانی دی گالھ اے ہے جو ٻہوں سارے میڈیا ہاؤسز اونکوں چیک کیتے بغیر چلا وی ݙیندن ۔ انہاں آکھیے جوعلاقائی صحافی اتھاں علاقے دے مسئلیں کوں جیویں سیلاب ہووے یا باقی ٻئے ایشوزاوندے حقائق تے ڳالھ کرن کیوں جو کوڑیاں خبراں نال انہاں دی آپݨی شہرت وی خراب تھیندی اے تے ݙوجھا علاقے دا وی ضیان تھیندے۔
