اسلام آباد۔21اکتوبر (اے پی پی سرائیکی سروس)فیک نیوز اڄ کل پوری دنیا کیتے ہک ٻہوں وݙا مسئلہ اے، ایندے حل اتے حد بندی کیتے نینگراں کوں چاہیدے جو او ایندی زد اچ نہ آون، اے مسئلہ پوری دنیا دے تقریباً ہر علاقے اچ موجود اے۔ ایں مسئلے کوں حل کرݨ کیتے اساکوں تعلیم اچ کمپونینٹ رکھݨ دی لوڑھ اے جو فیک نیوز کیا اے، خبر کیا ہوندی اے۔ اے ڳالھ انٹرنیشنل اسلامک یونیورسٹی اسلام آباد دے ڈین اتے میڈیا تے کمیونیکیشن سٹڈیز شعبہ دے پروفیسر ڈاکٹر ظفر اقبال سرائیکی نیوز سروس نال خصوصی ڳالھ مہاڑ کریندیں ہوئیں آکھی۔ انہاں آکھیا جو اساکوں تعلیمی سطح تے آگاہی ݙیوݨ دی لوڑھ اے۔ فیک نیوز دا ساریاں توں ودھ متاثر اساݙی نینگر نسل تھیندی اے، انہاں کوں ایندےبرے اثرات توں بچاوݨ کیتے ٻہوں ضروری اے جو اساکوں تعلیمی اداریاں اچ ایندی تعلیم دا خاص بندوبست کیتا ونڄے۔ ڈاکٹر ظفر اقبال آکھیا جو ایندے علاوہ اساکوں میڈیا لٹریسی کوں سمجھݨ ٻہوں ضروری اے جو اساں صحیح اتے غلط خبر دا چݨاؤ کینویں کرسڳدوں، اساکوں صحیح اتے غلط خبر دی سمجھ ٻجھ ہووݨی چاہیدی اے، کیڑھے میڈیا توں اساکوں کیڑھی خبر دی امید کرݨٰ چاہیدی اے اتے میڈیا لٹریسی ایندا تجزیہ کرݨ اچ مدد ݙیندی اے۔انہاں آکھیا جو انفارمیشن دا جیڑھا سیلاب آیا ہوئے اوندے کیتے میڈیا لٹریسی دا فروغ ٻہوں ضروری اے۔ جئیں قسم دی صورتحال معاشرے اچ ایں ویلھے موجود اے انہاں مسائل کوں حل کرݨ کیتے اساݙی نینگر نسل کوں میڈیا لٹریسی دی تعلیم حاصل کرݨ ٻہوں ضروری اے۔
