اسلام آباد۔26اکتوبر(اے پی پی سرائیکی سروس) میکوں ڳاندیں ہوئیں اکہتر سال تھی ڳن ،جے تئیں میݙی حیاتی اے اللہ سئیں توں ارداس اے جو میں ڳاندی راہواں۔ اے ڳالھیں جڳ مشہور گاہک ثریا ملتانیکر خواجہ فرید چیئر اسلامیہ یونیورسٹی بہاولپہور اچ ݙو روزہ خواجہ فرید سیمینار دے موقع تے اے پی پی سرائیکی نیوز سروس نال ڳالھ مہاڑ کریندیں ہوئیں آکھی۔ ایں موقع تے خواجہ فرید چیئر ولوں انہاں کوں لائف ٹائم اچیومنٹ ایوارڈ وی ݙتا ڳیا۔ خواجہ فریدچیئر ولوں اسلامیہ یونیورسٹی بہاولپور اچ ݙو ݙینھ دی تقریبات تھئی جئیں اچ کافی نائٹ دا وی اہتمام کیتا ڳیا۔ تقریب اچ اسلامیہ یونیورسٹی دے وائس چانسلر خواجہ اطہر محبوب اتے کوٹ مٹھن توں خواجہ معین الدین محبوب خصوصی طور شرکت کیتی۔ ثریا ملتانیکر اے پی پی سرائیکی سروس کوں ݙسائے جو میکوں ڳاوݨ نال عشق اے میں بساں ، گھراں اتے محفلاں اچ ڳاندی رہی آں۔ انہاں آکھیا جو میں شکر گزار ہاں اسلامیہ یونیورسٹی بہاولپور دی خواجہ فرید چیئر دی جو انہاں میکوں اڄ لائف ٹائم اچیومنٹ ایوارڈ ݙتے۔ حضرت خواجہ غلام فرید آپݨی شاعری اچ عشق ، محبت، امن دی ڳالھ کیتی اے اتے میں آپݨی نینگر نسل کوں اکھیساں جو او خواجہ فرید دی تعلیمات تے عمل کرن۔ ایں موقع تے انہاں دی دھی انگریزی دی استاد راحت بانو ملتانیکر وی آپݨا کلام پیش کیتا جݙانجو کافی نائٹ اچ ثریا ملتانیکر نا صرف لائیو ٹائم اچیومنٹ ایوارڈ آپݨے ناں کیتا جݙانجو ہال اچ موجود شائقین توں خوب داد ڳھنݨ دے نال نال خواجہ فرید دا کلام سݨا تے شائقین کوں جھمراں پاوݨ تے مجبور کر ݙتا۔
