اسلام آباد۔31اکتوبر (اے پی پی) وزیراعظم محمد شہباز شریف آکھیا جو پاکستان اتے چین وچال تجارت دے ودھارے دے ٻہوں موقع ہن، سی پیک پاکستان کیتے گیم چینجر منصوبہ اے، چین دے تعاون نال برآمدات ودھا سڳدوں، اقتصادی زونز اچ سرمایہ کاری اتے دیہاتی علاقیاں اچ زرعی صنعتاں نال ملکی برآمدات ودھسن۔ چین دے دورے نال ݙوہیں ملکاں وچال دوستی اتے تعاون ودھسی۔ اے ڳالھیں انہاں سنوار کوں پاکستان چائنا بزنس اینڈ انویسٹمنٹ فورم دی تقریب توں خطاب کریندیں ہوئیں آکھی۔ وزیراعظم آکھیا جو پہلے پاکستان چائنا بزنس اینڈ انویسٹمنٹ فورم کراوݨ تے مبارخ ݙینداں اتے امید اے جو اے فورم ݙوہیں مکاں وچال تجارت دے ودھارے اچ اہم کردار ادا کریسی۔ وزیراعظم آکھیا جو او منگل کوں چیند ے دورے تے روانہ تھیندے پن جتھ چین دے صدر شی جن پنگ ، وزیر اعظم لی کی چیانگ اتے ٻے چینی حکام نال تجارتی ،سٹریٹیجک اتے ثقافتی تعلقات کوں مضبوط ٻݨاوݨ کیتے تعمیری اتے مفید ڳالھ مہاڑ تھیسی۔ ویلھا آڳے جو ݙوہیں ملک آپݨے کاروباری تعلقات کوں ٻیا مضبوط ٻݨاوݨ ایںنال سی پیک دے ثمرات ودھسن اتے آپت اچ کاروباری رابطے وی ودھسن۔ انہاں آکھیا جو چین دی ہائی ٹیک انڈسٹری پاکستان دے اقتصادی زونز اچ آپݨی صنعتاں لاوے کیونجو پاکستان اچ افرادی قوت سستی اے اتے پاکستانی اتے چینی کمپنیاں کیتے اتھ ہکو سویں موقع ہوسن۔ وزیراعظم آکھیا جو پاکستان اچ زراعت دے شعبے کوں جدید خطوط تے استوار کرݨ دی لوڑھ اے۔ فی ایکڑ پیداوار ودھاوݨ کیتے اساں چین دے تجربے توں فائدہ چا سڳدوں۔ دیہاتی علاقیاں اچ زراعت دی صنعتاں لاوݨ نال مشرق وسطی اتے ٻے ملکاں کیتے برآمدات ودھائی ونڄ سڳدن۔ انہاں آکھیا جو چین دی حکومت اتے عوام ہر اوکھ اچ پاکستان نال تھئی اے جئیں تے انہاں دا شکریہ ادا کریندوں۔ چھل متاثرین کیتے چین پوری مدد کیتی اے اتے بیجنگ اتے اسلام آباد وچال ایئر برج ٻݨائے۔ خیمے ،خوراک اتے میڈیکل ٹیماں ٻھجوائی۔ چینی حکومت، کمپنیاں، عوام اتے انفرادی سطح تے چھل متاثرین دی مدد نال ݙوہیں ملکاں دی مضبوط دوستی دی عکاسی کریندی اے۔ ایں موقع تے وفاقی وزیر سرمایہ کاری بورڈ چوہدری سالک حسین آکھیا جو پاکستان اتے چین سٹریٹیجک شراکت دار ہن، ݙوہیں ملکاں دے تعلقات جیو پالیٹکس توں جیو اکنامک آلے پاسے ویندے پن۔ پاکستان اچ چین دے سفیر نونگ رونگ ایں موقع تے آکھیا جو پاکستان اچ چھل پاروں ٻہوں جانی تے مالی نقصان تھیے۔ چین دے صدر اتے وزیراعظم پاکستان دے صدر اتے وزیراعظم کیتے ہمدردی دا سنیھا ٻھجوائے اتے 644 ملین یوآن دا امدادی سامان ݙتے۔ ݙوہیں ملک ݙو پاسہ تعاون ودھاوݨ کیتے کم کرندے پن۔
