اسلام آباد۔1نومبر (اے پی پی) وفاقی وزیرمنصوبہ بندی، ترقی ،اصلاحات تے خصوصی اقدامات احسن اقبال آکھیا جو وزیر اعظم شہباز شریف دے دورہ چین اچ مختلف شعبیاں اچ مفاہمت دی کئی یادداشتاں اتے معاہدیاں تے دستخط تھیسن۔ ایم ایل ون نال پاکستان اتے چین ݙوہیں ملکاں دی معیشت تے مثبت اقتصادی اثرات پوسن۔ اے ڳالھیں انہاں منگل کوں وزیراعظم شہباز شریف نال ݙو روزہ دورہ چین کیتے روانگی توں پہلے میڈیا نال ڳالھ مہاڑ کریندیں ہوئیں آکھی۔ وفاقی وزیرآکھیا جو ایں دورے اچ مختلف شعبیاں اچ مفاہمت دی کئی یادداشتاں اتے معاہدیاں تے دستخط تھیسن۔ انہاں آکھیا جو وݙے پیمانے تے ݙو پاسہ تعاون دے ایجنڈے کوں اڳوں ودھاوݨ اتے سی پیک جوائنٹ کوآپریشن کمیٹی دے 27 اکتوبر کوں تھیوݨ آلے 11ویں اجلاس دے تناظر اچ سی پیک منصوبے تے تعاون دی رفتار کوں مستحکم کرݨ کوں یقینی ٻݨایا ویسی۔ وزیر اعظم شہباز شریف دے ایں دورے دی کامیابی دے اثرات دور رس تھیسن۔
