اسلام آباد۔1نومبر (اے پی پی) وزیر خارجہ بلاول بھٹو زرداری پاکستان اچ چھل متاثرین نال اظہار یکجہتی اتے انہاں دے مدد تے شنگھائی تعاون تنظیم دے رکن ملکاں دا شکریہ ادا کریندیں ہوئیں موسمیاتی تبدیلی دے تباہ کن اثرات نال نبڑݨ کیتے اجمتاعی کوششاں دی لوڑھ تے زور ݙتا۔ دفتر خارجہ دے ترجمان ولوں جاری بیان موجب اے ڳالھیں انہاں منگل کوں شنگھائی تعاون تنظیم (ایس سی او) دی کونسل آف ہیڈز آف گورنمنٹ (سربراہان حکومت) دے21 ویں اجلاس توں خطاب اچ آکھی۔ ورچوئل فارمیٹ اچ اجلاس دی میزبانی چین کیتی جو ایس سی او دی کونسل آف ہیڈز آف گورنمنٹ دا اڄوکا سربراہ اے۔ چین، قازقستان، کرغزستان، روس، تاجکستان اتے ازبکستان دے سربراہان حکومت نال نال ایس سی او دے مبصر ملکاں دےنمائندیاں وی اجلاس اچ شریک تھیے۔ وزیر خارجہ شنگھائی تعاون تنظیم دے رکن ملکاں وچال اقصادی اتے تجارتی تعاون ودھاوݨ دی اہمیت تے زور ݙیندیں ہوئیں آکھیا جو تنظیم دے خطے اچ ودھ توں ودھ رابطے ٻݨاوݨ نال ایس سی او وچال تعاون دی سیاسی اتے اقتصادی صلاحیت کوں کھولݨ اچ مدد ملسی۔ وزیر خارجہ آکھیا جو چین پاکستان اقتصادی راہداری (سی پیک) بیلٹ اینڈ روڈ انیشیٹو دا اہم منصوبہ اے جیڑھا علاقائی رابطے اتے انضمام دے ذریعے مشترکہ خوشحالی دے شنگھائی تعاون تنظیم دے وژن دی تکمیل کریندے۔ وزیر خارجہ بلاول بھٹو زرداری آکھیا جو ایس سی او کوں ٻہوں اہمیت ݙیندے اتے پاکستان شنگھائی تعاون تنظیم دے اصولوں دی بنیاد تے علاقائی تعاون کوں اڳوں ودھاوݨ کیتے مختلف معاہدیاں اتے منصوبیاں دے تحت اقدامات کیتن۔ کونسل آف ہیڈز آف گورنمنٹ شنگھائی تعاون تنظیم دا ݙوجھا اعلیٰ ترین فورم اے، جتھاں رکن ملکاں دے سربراہان حکومت آپݨے خیالات دا تبادلہ کریندن۔
