اسلام آباد۔2نومبر(اے پی پی)وزیر اعظم محمد شہباز شریف بیجنگ اچ چین دے سدر شی جن پنگ نال ملین۔ انہاں ایم ایل ون منصوبے کوں ابتدائی ہارویسٹ منصوبے دے طور تےش روع کرݨ تے اتفاق کیتے ڄݙاں جو چینی صدر پاکستان کوں 50 کروڑ یوان وادھو امداد ݙیوݨ دا اعلان کیتے۔ انہاں بھارت دے غیر قانونی زیر تسلط جموں و کشمیر دی صورتحال، سی پیک دی افغانستان تئیں توسیع تے وی الایا۔ وزیراعظم چینی کمیونسٹ پارٹی دی 20 ویں مرکزی کمیٹی دا ولا جنرل سیکرٹری ٻݨن تے صدر شی جن پنگ کوں مبارک ݙتی اتے چینی سدر کوں اپکستان اچ سیلاب نال نقصانات اتے مستقبل اچ ایندے چیلجز بارے ݙسیا۔ انہاں سیلاب متاثرین دا ہتھ ونݙاوݨ کیتے چین دی مدد تے شکریہ وی ادا کیتے۔ انہاں پاک چین تعاون اچ اڳونہی، باہمی دلچسپی دے علاقائی و عالمی امور سودھا ݙوطرفہ اسٹریٹجک کوآپریٹو پارٹنرشپ بارے الیندے عزم کیتا جو ݙوہیں ملک امن، استحکام، ترقی و خوشحالی دے مشترکہ وژن سانڳے ہمیشہ نال کھڑن۔ وزیراعظم چین دی خوشحالی کیتے صدر شی جن پنگ دیاں کامیابیاں دی تعریف کریندے آکھیا جو پاکستان وی چین دی سماجی و اقتصادی ترقی دی راہ تے ٹرݨ چاہندے۔ ملاقات اچ دفاع، تجارت وسرمایہ کاری، زراعت، صحت، تعلیم، گرین انرجی، سائنس و ٹیکنالوجی اتے آفات نال نمٹݨ کیتے تیاری سودھا ٻعے کئی اہم معاملیاں تے ڳلھ مہاڑ کیتی۔ انہاں ایم ایل اون، کراچی ماس ٹرانزٹ منصوبے سودھا کراچی سرکلر ریلوے منصوبیاں تے الایا۔ صدر شی جن پنگ یقین ݙیوایا جو چین پائیدار اقتصادی ترقی اتے جیو اکنامک مرکز سانڳے اپݨیاں صلاحیتاں نال پاکستان دی حمایت جاری رکھیسی۔ انہاں پاکستان اچ سیلاب متاثرین دی امداد و بحالی سانڳے 500 ملین یوان دے وادھو امدادی پیکج دا وی اعلان کیتے۔ وزیراعظم صدر شی جن پنگ کوں تیکھے پاکستان دا دورہ کرݨ دی دعوت ݙتی جیڑھی انہاں قبول کرڳھدی۔
