اسلام آباد۔4نومبر (اے پی پی) وفاقی وزیر ریلوے خواجہ سعد رفیق آکھیا جو وزیراعظم شہباز شریف دا چین دا دورہ کامیاب رہیے۔ اسلام آباد اچ پریس کانفرنس کریندیں ہوئیں انہاں آکھیا جو ہر بندے وزیرآباد واقعے دی مذمت کیتی اے۔ اساں سیاسی مخالفین ضرور ہیسے پر ہک ݙوجھے دی جان دے دشمن کائنی۔ وفاقی وزیر آکھیا جو اگر پاکستان تحریک انصاف دی قیادت کوں پہلے توں حملے دا پتہ ہئی تاں انہاں حفاظتی اقدامات کیوں نی کیتے سعد رفیق آکھیا جو تحریک انصاف دا لانگ مارچ ناکام ویندا پیا ہئی۔ لوک انہاں دی کال تے ٻاہر نی نکلیے۔ انہاں آکھیا جو ماضی اچ سابق صدر آصف علی زرداری ، بینظیر دی شہادت تے آپݨے کارکناں کوں پر امن رہوݨ دا درس ݙتے۔ خواجہ سعد رفیق آکھیا جو عمران خان دا اے کیجھا زخم اے جیڑھا شوکت خانم ونڄ تے ٹھیک تھیے۔ سیاسی قیادت کوں ذمہ واری دا مظاہرہ کرݨا چاہیدے۔ سیاست اچ برداشت اتے تحمل نال کم ڳھݨا چہیدے۔ عمران خان دا ہک وزیر کلاشنکوف چا تے آکھدے جو رانا ثناء اللہ اساں امدے پیوں۔ خواجہ سعد رفیق آکھیا جو صوبائی حکومت دی زمہ واری اے جو ایں واقعے دی تحقیقات کرے۔ صوبائی حکومت کیوں نی الیندی پی۔ عمران خان دی سکیورٹی دی ذمہ واری پنجاب حکومت دی ہئی۔
