شرم الشیخ۔8نومبر (اے پی پی) وزیراعظم محمد شہباز شریف جرمنی نال تجارت، سرمایہ کاری،ماحولیاتی تبدیلی اتے قابل تجدید توانائی سودھے کئی شعبیاں اچ آپسی تعلقات کوں ٻیا مضبوط کرݨ دی خواہش دا اظہار کریندیں ہوئیں آکھیا جو پاکستان اتے جرمنی کوں مختلف شعبیاں اچ نینگراں کوں موقع ݙیوݨ کیتے وسیع تعاون کرݨا چاہیدے۔ اے ڳالھیں انہاں جرمنی دے چانسلر اولاف شولز نال ماحولیاتی سربراہ اجلاس کوپ۔27 دے موقع تے ملاقات اچ آکھی۔ ݙوہیں رہنماواں آپسی تعلقات دا جائزہ ڳھدا اتے تعاون کوں ودھاوݨ دے امکانات تے غور کیتا۔ ملاقات اچ آپسی دلچسپی دے علاقائی اتے عالمی معاملیاں تے وی ڳالھ کیتی ڳی۔ ۔وزیراعظم جرمن عوام دے عزم دی تعریف کریندیں ہوئیں جرمنی نال تجارت، سرمایہ کاری،ماحولیاتی تبدیلی اتے قابل تجدید توانائی سودھے آپسی تعلقات کوں ٻیا ودھاوݨ دی خواہش دا اظہار کیتا۔ وزیراعظم جرمنی ولوں پاکستان کوں سالیں توں ݙتی ڳی تکنیکی تربیت تے شکریہ ادا کریندیں ہوئیں علم دے تبادلی دی لوڑھ تے زور ݙتا۔ انہاں پاکستان اچ ماحولیاتی تبدیلی نال آئے تباہ کن چھل دے بعد جرمنی ولوں پاکستان دی امداد تے جرمنی دا شکریہ ادا کریندیں ہوئیں جرمن چانسلر کوں حکومت دے بحالی اتے تعمیر نو دے منصوبے بارے بریفنگ ݙتی۔ وزیراعظم آکھیا جو افغانستان اچ انسانی اتے اقتصادی صورتحال پاروں بین الاقوامی برادری دی افغان عبوری حکومت نال مسلسل ڳالھ مہاڑ ٻہوں اہمیت رکھیندی اے۔ وزیراعظم جرمن چانسلر دی توجہ بھارت دے غیرقانونی طور زیر تسلط جموں تے کشمیر آلے پاسے ݙویندیں ہوئیں آکھیا جو ایں نتیجے اچ علاقائی امن اتے استحکام کوں خطرہ اے۔
