شرم الشیخ۔8نومبر(اے پی پی)وزیراعظم محمد شہباز شریف ماحولیاتی تبدیلی دے اثرات ڳھٹ کرݨ کیتے فوری اقدامات تے زور ݙیندے آکھیے جو پاکستان خشک علاقیاں اچ جنگلات دی بحالی کیتے تکنیکی مہارت نال’’مڈل ایسٹ گرین انیشی ایٹو ‘‘ دے مقاصد کیتے پرعزم اے، ڄڳ کوں ماحولیاتی تبدیلیاں دے منفی اثرات توں بچاوݨ کیتے تعاون ودھاوݨا ہوسی۔ اے ڳالھ انہاں مڈل ایسٹ گرین انیشیٹو سمٹ نال خطاب اچ آکھی جو پاکستان پائیدار مستقبل دے مشترکہ وژن، مؤثر تعاون، علاقائی، بین الاقوامی روابط اتے سائنس تے مبنی فیصلہ سازی اصولاں دی حمایت کریندے، پاکستان موسمیاتی تبدیلی دے اثرات تے قابو پاوݨ کیتے ایم جی آئی دی حمایت کریندے اتے اساں ایں سانڳے رکن ملکاں نال ڄڳ کوں موسمیاتی تبدیلی دے اثرات توں بچاوݨ کیتے تعاون چاہندے ہیں۔ انہاں آکھیا جو موسمیاتی تبدیلیاں تے قابو پاوݨ کیتے مشترکہ ایجنڈے تے کم کرݨ دی لوڑھ اے تاںجو گرین ہائوس گیساں دا اخراج روکݨ، قومی و علاقائی سطح تے تھیوݨ آلے نقصانات اچ کمی سانڳے اقدامات ساݙی ترجیح ہین۔ وزیراعظم آکھیا جو پاکستان اتے مڈل ایسٹ گرین انیشیٹو اچ مختلف ملک ماحولیاتی تبدیلیاں دے اثرات پاروں متاثر تھیندے پن جیندے نال قدرتی وسائل اچ کمی سودھا روزگار وی متاثر تھیندے، موسمیاتی تبدیلی سانڳے جنگلات پالیسی اتے گرین پاکستان پروگرام دے تحت شجر کاری نال 2023ء تئیں 3 ارب 30 کروڑ درخت لائے ویسن، پاکستان دے پروٹیکٹڈ ایریاز انیشیٹو پاروں ساݙے خطرے وات وݨ ٻوٹے اتے زناوراں کیتے 36 لکھ ایکڑ رقبہ محفوظ علاقیاں اچ رلایا ویسی۔ انہاں ایم جی آئی رکن ملکاں کوں خشکی آلے علاقیاںا چ جنگلات دی بحالی، مین گرووز، محفوظ علاقیاں دے انتظام، کاربن سٹاک دی تشخیص اتے جنگلات دی نگرانی بارے نظام سانڳے تجربات اتے تکنیکی مہارت ݙیوݨ دی وی پیشکش کیتی۔
