اسلام آباد۔8نومبر(اے پی پی)ینگ پارلیمنٹرین فورم دا اجلاس ینگ پارلیمنٹرین فورم دے پیٹرن انچیف اسپیکر قومی اسمبلی دی اجازت نال تھیا جیندے اچ فورم دے نویں صدر دا چݨائو تھئے۔ اے نشست ینگ پارلیمنٹرین فورم دے صدر سابق رکن قومی اسمبلی زین حسین قریشی دے قومی اسمبلی دی رکنیت توں استعفیٰ ݙیوݨ توں بعد خالی تھئی ہئی۔ اجلاس اچ ممبر قومی اسمبلی علی موسیٰ گیلانی ینگ پارلیمنٹرین فورم دے متفقہ صدر چݨیے ڳین۔ صدر ٻݨݨ توں بعد علی موسیٰ گیلانی ارکان دا شکریہ ادا کریندے آکھیا جو پنگ پارلیمنٹرین فورم عوام دی خدمت دا ہک بہترین فورم اے، فورم کوں فعال اتے تکڑا کرݨ کیتے رل تے کم کریسوں جو لوکاں خاص کر نینگراں دے مسلے حل تھیون۔ ایں موقع تے اسپیکر قومی اسمبلی راجہ پرویز اشرف اتے ڈپٹی اسپیکر زاہد اکرم درانی علی موسیٰ گیلانی کوں ینگ پارلیمنٹرین فورم دا متفقہ صدر ٻݨݨ تے مبارخ ݙتی۔ اسپیکر قومی اسمبلی امید کیتی جو علی موسیٰ گیلانی دی اڳواݨی اچ ینگ پارلیمنٹرین فورم ٻیا فعال تھیسی۔ اجلاس اچ جویریہ ظفر ہیر، عامر جیوا، رومینہ خورشید عالم، عالیہ کامران، سید رفیع اللہ، محمد خان ݙاہر، ایڈیشنل سیکرٹری قانون سازی محمد مشتاق اتے ایڈیشنل سیکرٹری خصوصی اقدامات سید شمعون ہاشمی وی شرکت کیتی۔
