اسلام آباد۔8نومبر(اے پی پی)وفاقی وزیر داخلہ رانا ثنا اللہ خان پنجاب اتے کے پی کے حکومتاں تے زور ݙتے جو او اپݨیاں قانونی و آئینی ذمہداریاں نبھیندے ہوئے قومی شاہراواں اتے موٹرویز مظاہرین تؤں کلیئر کراون اتے لوکاں کوں سوکھ ݙیوݨ دے اقدامات کرن، پی ٹی آئی دے لانگ مارچ دا مقصد وفاق تے حملہ آور تھیوݨ دا منصوبہ اے، کوڑی ایف آئی آر درج نا کرا سڳݨ آلیاں کوں اپݨی اوقات ݙس پئی ہوسی۔ پریس کانفرنس اچ انہاں آکھیا جو پنجاب اتے خیبر پختونخواہ اچ صوبائی حکومتاں، پولیس دی تݙ تے احتجاجی مارچ تھیندا پئے، سڑکاں بند کر تے لوکاں کوں اوکھا کیتا ویندا پئے، ٹریفک جام نال مسلے ودھدے پن، لوک ہسپتالاں، سکول و کالج ونڄݨ، خوشی غمی اچ رلݨ کیتے خوار تھیندے پن، پولیس دا کم اے جو او لوکاں کوں تھفظ ݙیون نال کہ مظاہرین دے ٻانھ ٻیل ٻݨن، صوبائی حکومتاں آئینی و قانونی ذمہ داری پوری کرن نتاں ایندے آئینی اثرات پوسن، عدلیہ معاملے دا نوٹس ڳھنے، آئین و قانون دی خلاف ورزی توں روکیا ونڄے، ڳݨیے چݨیے شرپسنداں کوں اجازت نا ݙتی ویسی جو عام لوکاں کوں اوکھا کرن اتے ریاست کوں یرغمال ٻݨاون۔
