اسلام آباد۔10نومبر (اے پی پی) چین دی پیپلز ایسوسی ایشن فار فرینڈ شپ ود فارن کنٹریز (سی پی اے ایف ایف سی) دے صدر لین سونگ تیان آکھیا جو چین انفراسٹرکچر دی ترقی اتے نینگراں دی استعداد ودھاوݨ کیتے پاکستان دی مدد کریسی۔ اے ڳالھیں انہاں خمیس کوں اسلام آباد اچ چینی سفارتخانے اچ پریس کانفرنس توں خطاب کریندیں ہوئیں آکھی۔ انہاں چین اتے پاکستان دی مثالی دوستی دا ذکر کریندیں ہوئیں آکھیا جو چین دے اے ذمہ واری اے جو او تجارت کوں ودھا تے اوندے بنیادی ڈھانچے اتے ٹیکنالوجی دی ترقی کوں جدید ٻݨا تے پاکستان کوں غریبی توں کݙھے۔ لین سونگ تیان آکھیا جو انہاں دے اہداف دے حصول کیتے تعلیم دے علاوہ تکنیکی مہارت بنیادی اہمیت رکھیندی اے۔ انہاں آکھیا جو سی پی اے ایف ایف سی ݙوہیں ملکاں وچال تعلقات کوں مضبوط ٻݨاوݨ کیتے لوکاں وچال تبادلے کوں ودھاوݨ اچ آپݨا کردار ادا کریسی۔ لین سونگ تیان آکھیا جو آگاہی ݙیوݨ کیتے میڈیا دا کردار اہم اے، انہاں ذرائع ابلاغ تے زور ݙتا جو او ݙوہیں ملکاں دی ترقی اتے پیش رفت کوں اجاگر کرݨ اچ آپݨا کردار ادا کرے۔ ہک سوال دے ولدے اچ انہاں آکھیا جو بیلٹ اینڈ روڈ انیشیٹو سانجھے مستقبل دی عالمی برادری دی تعمیر کیتے ہک وݙا پلیٹ فارم اے اتے اے انسانیت دی سانجھی ترقی کیتے ہک اہم کم اے۔ چین دی پیپلز ایسوسی ایشن فار فرینڈ شپ ود فارن کنٹریز دے صدر آکھیا جو سی پیک دے پہلے مرحلے اچ پاکستان اچ توانائی دے بحران اچ ڳھٹکی آئی اتے مواصلاتی ڈھانچے اچ بہتری آئی اے۔ ݙوہیں ملک ایں روایتی دوستی کوں ودھاوݨ کیتے کم کریندے پئن۔ چین دی کمیونسٹ پارٹی دی 20 ویں قومی کانگریس دا ذکر کریندیں ہوئیں انہاں آکھیا جو کانگرس دے کامیاب اختتام تے پاکستان دے وزیر اعظم چین دا دورہ کیتا جیڑھا کہیں وی غیر ملکی سربراہ دا پہلا دورہ چین ہئی۔ آپݨے دورے پاکستان بارے ہک سوال دے ولدے اچ انہاں آکھیا جو پاکستان اچ انہاں دا پرتپاک استقبال کیتا ڳے۔ چینی عوام پاکستانی بھراواں اتے ٻھیݨیں توں ٻہوں متاثر ہن۔ انہاں آکھیاجو اساں 2008 دی سردیاں اچ آوݨ آلے تباہ کن زلزلے دے بعد چین کیتے پاکستان دی مدد کوں کݙاہیں نہ ٻھلسوں۔
