اسلام آباد۔14نومبر(اے پی پی)احمدپور شرقیہ دی وستی محراب آلا اچ وائس چانسلر اسلامیہ یونیورسٹی پروفیسر ڈاکٹر اطہر محبوب “ظفر لشاری ریسرچ لائبریری” دا افتتاح کر ݙتے۔ سرائیکی زبان دا وݙا ناں ظفر لاشاری محراب آلا وستی اچ نیک بندے محمد ابراہیم خان لاشاری دے گھر ڄمین۔ انھاں سرائیکی زبان دا پہلا ناول محبتاں تے نفرتاں دی کہانی “نازو” لکھیا۔ انہاں ݙوڄھا ناول “پہاڄ” وی چھپیا جیندے اچ شہر تے وستیاں دے جیوݨ دی بہترین عکاسی کیتی گئی اتے ایکوں سرائیکی زبان دا ہک شاہکار ناول منیا ویندے۔ ظفر لاشاری دے ڄڳ توں منہ موڑݨ دے بعد انہاں دے پتراں ادھورے خواب کوں پورا کیتے جو ظفر لاشاری “ریسرچ لائبریری” ٻݨاوݨ چاہندے ہن۔ انہاں دے ٻالاں سرکاری فلاح تنظیم “الصادق ڈیزرٹ ویلفیئر آرگنائزیشن” اتے “یو ایس ایڈ” دے ڳانݙھے نال محراب والا اچ صحرائی درختاں اچ گھری خواب گاہ “جھوک لاشاری” تے “ظفر لاشاری ریسرچ لائبریری” ٻݨائی اے جیندا افتتاح وائس چانسلر اسلامیہ یونیورسٹی بہاولپور انجینئر پروفیسر ڈاکٹر اطہر محبوب اتے ڈین فیکلٹی آف آرٹس تے لینگویجز پروفیسر ڈاکٹر جاوید حسان چانڈیو کیتے۔ تقریب اچ پورے سرائیکی وسیب توں ادیباں شاعراں تے دانشوراں، معروف سرائیکی ادیب عبد الباسط بھٹی، شاہد عالم شاہد، اسلامیہ یونیورسٹی دے ڈائریکٹر پبلک ریلیشنز شہزاد احمد خالد، ڈاکٹر ممتاز خان بلوچ، ڈاکٹر عصمت اللہ شاہ، ڈاکٹر غلام اصغر، وقار مشتاق، معظم درانی، اشرف کھوسہ، راشد رسول، الطاف ڈاہر، زبیر خان لاشاری ، لعل ندیم لاشاری، طارق محمود خان لودھی، عبدالمجید خان، جام عمران لاڑ، رانا عامر شہزاد، ریاض بلوچ اتے ڈاکٹر فرحت عباس وی شریک تھئے ۔
